Minčancy, jakaja prasiła ŭ Łukašenki kvateru za troch narodžanych dačok, pakul padaryli trochmiesnuju kalasku
Anhielinu Kaminskuju z trajniatami vypisali z RNPC «Maci i dzicia» damoŭ.
Anhielina Kaminskaja z mužam Stanisłavam. Tut i dalej fota ź jaje instahrama
Zabiraŭ siamju małady baćka Stanisłaŭ Kaminski — jon, darečy, staršy siaržant Departamienta achovy MUS.
Vysokija čynoŭniki vinšavać dziorzkuju dziaŭčynu ŭsio ž nie pryjšli (choć u RNPC usio terminova rychtavali da ich sustrečy) — abmiežavalisia pryjezdam praŭładnych ŚMI i pradstaŭnikoŭ łukašenkaŭskaj «Biełaj Rusi».
Apošnija ŭsio ž udakładnili ŭ Anhieliny, jaki padarunak jana b chacieła atrymać na vypisku.
Maładaja maci adkazała, što trochmiesnuju kalasku — i ŭčora joj sapraŭdy ŭračysta ŭručyli siertyfikat na 2000 rubloŭ.
A ŭ instahramie «Biełaj Rusi» namiaknuli, što «dziakujučy kłopatu dziaržavy ab šmatdzietnych siemjach nieŭzabavie žyllovaje pytańnie vyrašycca».
Na minułym tydni minčanka 25‑hadovaja Anhielina Kaminskaja stała zorkaj sacsietak — jaje zvarot da Łukašenki ŭ instahramie pahladzieła ŭžo 6,4 miljona čałaviek.
Maładaja maci kazała, što, pakolki ŭ Hod biełaruskaj žančyny padaryła krainie troch cudoŭnych žančyn, jana moža i «stać nachabnaj». Anhielina ŭstaviła ŭ rolik videa, u jakim Łukašenka kaža: «Darahija žančyny! Naradzicie treciaje małoje i patrabujcie ad mianie što zaŭhodna».
Tamu Anhielina vyrašyła skarystacca prapanovaj.
«U suviazi z hetym ja vielmi-vielmi chaču vas paprasić dla našaj maleńkaj, ale takoj užo vialikaj siamji žytło ŭ horadzie Minsku. Tamu što naša maładaja siamja, na žal, jašče nie paśpieła abzavieścisia žyllom. Dla taho, kab dziaŭčynki raśli ŭ kamforcie i dastatku, heta budzie vielmi-vielmi darečy».
Zvarot vyklikaŭ vialiki rezanans u biełaruskim hramadstvie. Adny zachaplalisia śmiełaściu Anhieliny, inšyja paličyli heta nachabstvam.
Sama ž Anhielina zmahła dobra raskrucić svoj instahram — ciapier u jaje 64 tysiačy padpisčykaŭ. Tyja, darečy, pasprabavali złavić dziaŭčynu na chłuśni — bo častka kantentu błoha pryśviečana ramontu ŭ kvatery.
Ludzi pačali sumniavacca, što takija maštabnyja pieramieny niechta stanie rabić u arendnym žylli. Anhielina ž rastłumačyła: kvatera naležyć jaje baćkam. Ale pakolki jana sama sa šmatdzietnaj siamji, dyk nie moža dazvolić sabie pakryŭdzić svajakoŭ.
Paśla zvarotu Anhieliny biełaruski zładzili fłešmob u sacsietkach: šmatdzietnyja siemji (siarod ich byli i tyja, dzie taksama jość trajniaty) pačali prasić Łukašenku dać kvateru i im.
Naprykład, Nastaśsia Bahatyrova, maci trajniataŭ-chłopčykaŭ raspaviała ŭ videa, što paŭtara hoda saromiełasia źviartacca pa dapamohu, ale kali pajšoŭ taki trend, dyk i jana paprosić kvateru. Žančyna padkreślivaje, što raścić unukaŭ vieterana MUS.