Estonija hatovaja całkam zakryć miažu z Rasijaj u vypadku abjaŭleńnia tam mabilizacyi

Estonija rychtujecca da mahčymaści abviaščeńnia ŭ Rasii novaj mabilizacyi i ŭ vypadku nieabchodnaści moža całkam zakryć suchaputnuju miažu z Rasijaj. Pra heta zajavili premjer-ministr Estonii Krysten Michał i ministr zamiežnych spraŭ Marhus Cachkna, paviedamlaje ERR.

Na miažy Estonii z Rasijaj. Fota ilustracyjnaje

Pa słovach Krystena Michała, rašeńni buduć prymacca ŭ zaležnaści ad acenki ŭzroŭniu pahrozy. Jon adznačyŭ, što pamiežnyja punkty možna zakryć vielmi chutka, jak heta ŭžo rabiłasia ŭ situacyjach, kali na miažy ŭźnikali biesparadki. Palicyja i Pamiežnaja słužba, a taksama Ministerstva ŭnutranych spraŭ Estonii hatovyja da takoha kroku.

Marhus Cachkna zajaviŭ, što Estonija nie ličyć nieabchodnym davać mižnarodnuju abaronu rasijanam, jakija mohuć uciakać u Jeŭropu ad mabilizacyi. Pavodle jaho słoŭ, letaś krainy Šenhienskaj zony vydali rasijskim hramadzianam kala 650 tysiač viz, a ŭ vypadku novaj mabilizacyi mihracyjny cisk moža ŭzmacnicca.

Pry hetym Cachkna adznačyŭ, što Estonija ŭžo abmiežavała ŭjezd dla takich hramadzian. Jon taksama zajaviŭ, što jeŭrapiejskim partnioram nieabchodna ŭličvać mahčymy rost unutranaj napružanaści ŭ Rasii i jaho ŭpłyŭ na biaśpieku Jeŭropy.

Ministr padkreśliŭ, što sami pa sabie ŭcioki z Rasii ŭ Jeŭropu ŭ vypadku mabilizacyi, na dumku Estonii, nie pavinny aŭtamatyčna davać čałavieku padstavy dla atrymańnia mižnarodnaj abarony.

Raniej vydańnie Bloomberg paviedamlała, što mahčymaści novaj chvali mabilizacyi ŭ Rasii aścierahajucca navat niekatoryja čynoŭniki Kramla i supracoŭniki vajenkamataŭ.

Kamientary da artykuła