U polskim Muziei bitvy pad Hrunvaldam zrobiać biełaruskamoŭny aŭdyjahid
15 vieraśnia ŭ Varšavie Śviatłana Cichanoŭskaja sustrełasia z dyrektaram Muzieja bitvy pad Hrunvaldam u Stembarku, historykam Šymanam Drejem. U sustrečy taksama ŭdzielničali inicyjatar kampanii za ŭstalavańnie bieł-čyrvona-biełaha ściaha na Hrunvaldskim poli Juryj Mielaškievič i hałoŭny daradca Cichanoŭskaj Franak Viačorka.
Šyman Drej padčas sustrečy sa Śviatłanaj Cichanoŭskaj. Fota
Cichanoŭskaja padziakavała Dreju za padtrymku idei zrabić bolš zaŭvažnym udzieł vajaroŭ z terytoryj sučasnaj Biełarusi ŭ Hrunvaldskaj bitvie i štohadovych pamiatnych mierapryjemstvach.
Baki damovilisia pra doŭhaterminovaje supracoŭnictva. Płanujecca padrychtavać biełaruskuju viersiju aŭdyjahida ŭ muziei, a taksama zabiaśpiečyć udzieł pradstaŭnikoŭ biełaruskich demakratyčnych sił u mižnarodnych mierapryjemstvach muzieja razam z partniorami z Polščy, Litvy i Ukrainy.
Na Hrunvaldskim poli
Da čarhovaj hadaviny Hrunvaldskaj bitvy ŭ lipieni 2027 hoda płanujecca pašyryć udzieł biełaruskaj supolnaści i biełaruskich histaryčnych rekanstruktaraŭ u pamiatnych mierapryjemstvach.
Akramia taho, udzielniki sustrečy abmierkavali mahčymaść ustalavańnia na Hrunvaldskim poli pamiatnaha znaka ŭ honar vajaroŭ z terytoryj sučasnaj Biełarusi i fłahštoka ź bieł-čyrvona-biełym ściaham.
Hrunvaldskaje pole maje ŭ Polščy status pomnika historyi. Tamu dla ŭstalavańnia novych abjektaŭ nieabchodna prajści adpaviednyja administracyjnyja pracedury i atrymać dazvoły orhanaŭ, jakija zajmajucca achovaj kulturnaj spadčyny.
Čytajcie taksama:
Hrunvaldski muziej adkazaŭ na prośbu biełarusaŭ pastavić na poli bieł-čyrvona-bieły ściah
Za bieł-čyrvona-bieły ściah na Hrunvaldskim poli sabrali 841 podpis