Za bieł-čyrvona-bieły ściah na Hrunvaldskim poli sabrali 841 podpis
U ideale arhanizatary pietycyi za bieł-čyrvona-bieły ściah na Hrunvaldskim poli chacieli b sabrać 12 tysiač podpisaŭ. Stolki voinaŭ ź biełaruskich terytoryj udzielničali ŭ bitvie, piša Radyjo Svaboda.
Pietycyja z prośbaj ustalavać na Hrunvaldskim poli fłahštok ź bieł-čyrvona-biełym ściaham za tydzień sabrała 823 podpisy. Siarod viadomych padpisantaŭ — Aleś Łahviniec, Jury Hubarevič, Anatol Labiedźka, Vital Rymašeŭski, Ihar Barysaŭ.
V.a. staršyni Partyi BNF Jury Mielaškievič, jaki paznačany jak inicyjatar pietycyi, raskazaŭ Svabodzie, što ideja kampanii naležała Alesiu Łahvincu, jaki pieršym źviarnuŭ uvahu na adsutnaść bieł-čyrvona-biełaha ściaha na Hrunvaldskim poli na stałaj asnovie.
«Muziejnaja prastora Hrunvaldskaha pola raźvivajecca. Tam spačatku prysutničali ściahi Polščy, paśla Litvy. U niejki momant dadaŭsia ściah Ukrainy. Dla zaviaršeńnia konturu dziaržaŭnych subjektaŭ, jakija biespasiarednie ŭdzielničali ŭ pieramozie, viadoma, biełaruski ściah pavinien tam być», — kamientuje surazmoŭca.
Sa słovaŭ Mielaškieviča, u pieršy dzień zbor podpisaŭ išoŭ dobra, bo ludzi dzialilisia im u sacyjalnych sietkach. Adnak užo na druhi dzień Facebook zabaraniŭ raspaŭsiudžvać hetuju pietycyju, i zbor zapavoliŭsia.
«Mnie dasłali infarmacyjny dopis, što ja niejkim čynam parušyŭ palityku Facebook — štości źviazanaje sa spamam ci zboram pryvatnaj infarmacyi. I Facebook vydaliŭ spasyłki, rasšaranyja ŭ sacyjalnych sietkach. Niekatoryja ludzi navat paciarpieli, im častkova abmiežavali funkcyjanał Facebook», — raskazvaje Jury.
Inicyjatary pietycyi chacieli b sabrać 10—12 tysiač podpisaŭ da 15 lipienia, kali budzie adznačacca 616‑ia hadavina Hrunvaldskaj bitvy.
«Dvanaccać tysiač — heta simvaličnaja ličba, bo jana adpaviadaje toj kolkaści voinaŭ, jakija, z punktu hledžańnia ciapierašniaj navuki, z terytoryi Biełarusi ŭdzielničali ŭ słavutaj bitvie», — tłumačyć Mielaškievič.
Jury kaža, što ciapier zbor podpisaŭ zapavoliŭsia. Tamu jon choča pravieści hramadskuju kampaniju za nacyjanalny ściah na Hrunvaldskim poli z dapamohaj palityčnych i hramadskich arhanizacyj i dziejačaŭ. Raźličvaje taksama na pašyreńnie pietycyi ŭ Telegram, na inšych dasiažnych sacyjalnych kanałach i ŭ miedyja.
«My źviarnulisia da našych polskich partnioraŭ, u tym liku dziakujučy Anatolu Labiedźku, jaki hetaje pytańnie padymaŭ u Brusieli», — paviedamiŭ surazmoŭca.
Rašeńnie ab mačcie ź bieł-čyrvona-biełym ściaham na miescy padziei pavinna pryniać kiraŭnictva muzieja bitvy pad Hrunvaldam.
«Dumaju, što tut moža być załučanaja administracyja adpaviednaj hminy, pavieta, a navat i vajavodstva», — dadaje Jury.
Pieramovy naŭprost z muziejem płanujuć vieści, kali źbiarecca prynamsi 1—2 tysiačy podpisaŭ.
«Ja spadziajusia na razumieńnie. U nas davoli daŭniaja historyja adnosinaŭ z polskimi kulturnickimi inicyjatyvami, ustanovami. Ja spakojna staŭlusia da hetych pieramovaŭ i pazityŭna hladžu napierad», — kaža Mielaškievič.
Ciapier čytajuć
U Francyi ad śpioki zahinuŭ dalnabojščyk z Dokšycaŭ1
Kamientary
Pašyrym dopis