Ci pavinny biełarusy nieści adkaznaść za vajnu? Novaje apytańnie nastrojaŭ ukraincaŭ
Na Forumie Astrožskich u Kijevie prezientavali vyniki novaha daśledavańnia pra ŭkrainska-biełaruskija adnosiny.
Akcyja salidarnaści z udziełam biełarusaŭ suprać vajny. Vilnia, 24 lutaha 2024 hoda. Fota: «Naša Niva»
Jaho pravioŭ Instytut palityčnych daśledavańniaŭ «Palityčnaja śfiera» pry padtrymcy Niamieckaha fondu Maršała ZŠA (GMF) i ES. Zbor źviestak va Ukrainie adbyvaŭsia ŭ supracoŭnictvie z daśledčaj kampanijaj Info Sapiens.
Ukraincaŭ spytali, jak jany staviacca da biełarusaŭ. 44,5% adkazali, što pazityŭna, 36,1% — niehatyŭna, astatnija vahalisia z adkazam. Pry hetym, kali paraŭnać z apytańniami 2022, 2023 i 2025 hadoŭ, staŭleńnie palepšała.
Razam z tym amal pałova apytanych (49,5%) adznačyła, što z pačatkam poŭnamaštabnaj vajny va Ukrainie staŭleńnie da biełarusaŭ pahoršała (dla 47,1% staŭleńnie nie źmianiłasia). Paharšeńnie najpierš tłumačać vajskovaj i palityčnaj padtrymkaj Rasii z boku Biełarusi, biaździejnaściu i maŭčańniem biełarusaŭ.
Na pytańnie, ci ličać jany Alaksandra Łukašenku lehitymnym kiraŭnikom Biełarusi, 75,9% adkazali, što nie ci chutčej nie.
Śviatłanu Cichanoŭskuju viedajuć 58,9% apytanych ukraincaŭ. U 2022‑m było bolej — 76,5%.
58,7% apytanych adkazali, što čuli pra Połk Kalinoŭskaha i inšych biełaruskich dobraachvotnikaŭ.
Ukraincaŭ taksama spytali, chto pavinien nieści adkaznaść za ŭdzieł Biełarusi ŭ rasijskaj ahresii suprać Ukrainy. Bolšaść (54,4%) ličyć, što biełaruskaja dziaržava i ŭłada. Jašče 28,6% — što i dziaržava, i hramadstva. 8,2% adkazali, što nichto, bo biełarusy nie vinavatyja, nie biaruć udziełu. 2,6% ličać, što adkaznaść pavinna nieści biełaruskaje hramadstva.
Havoračy pra mirnyja pieramovy, 75,1% vykazvajecca suprać taho, kab Biełaruś dapuskali da pieramoŭ. 13,8% ličać, što Biełaruś moža być pasiarednikam, a 3,6% — paŭnavartasnym udzielnikam. Astatnim było składana adkazać.
Žorstkuju rytoryku da Łukašenki, jakoj apošnim časam prytrymlivajucca ŭkrainskija ŭłady, tak ci inakš padtrymlivaje 77,7% apytanych ukraincaŭ. A naładžvańnie adnosin z demakratyčnymi siłami Biełarusi padtrymlivaje 67,4%.