U Śvisłackim rajonie buduć sudzić troch čałaviek, jakija dapamahali nielehalnym mihrantam
Adzin z machlaroŭ byŭ u formie pamiežnika.
Prakuratura Śvisłackaha rajona nakiravała ŭ sud kryminalnuju spravu ŭ dačynieńni da troch asob, jakim inkryminavanyja machlarstva, ździejśnienaje hrupaj asob, samavolnaje prysvajeńnie ŭłady słužbovaj asoby, arhanizacyja niezakonnaj mihracyi.
Adzin z abvinavačanych dastaviŭ mihrantaŭ na aŭtamabili ŭ zahadzia abumoŭlenaje miesca ŭ Śvisłackim rajonie. Tam ich čakaŭ druhi saŭdzielnik, pieraapranuty ŭ formu vajskoŭca orhanaŭ pamiežnaj słužby, piša BiełTA
Pad padstavaj praviadzieńnia asabistaha pieratrusu iłžepamiežnik zapatrabavaŭ ad zamiežnych hramadzian vyjści z transpartnaha srodku, pierakłaści rečy i źbieražeńni ŭ mašynu zmoŭščyka. Zavałodaŭšy hrašyma i majomaściu mihrantaŭ na 1500 rubloŭ, zmoŭščyki źjechali.
Akramia taho, u červieni 2025 hoda adzin z abvinavačanych sumiesna sa svajoj 24‑hadovaj znajomaj akazaŭ sadziejničańnie piaci zamiežnym hramadzianam u sprobie niezakonnaha pierasiačeńnia miažy. Za pieravozku zamiežnikaŭ z Maładziečna ŭ Śvisłacki rajon jany atrymali 350 dalaraŭ. Kab palehčyć mihrantam prachod praz zaharody, abvinavačany nabyŭ i pieradaŭ im rydloŭku i dva bałtarezy.
Niahledziačy na akazanuju dapamohu, nielehalnyja mihranty byli zatrymanyja supracoŭnikami pamiežnaj słužby pry sprobie pierasiačeńnia miažy. Siłaviki ŭstanavili dačynieńnie arhanizataraŭ da ździajśnieńnia złačynstva.