Były namieśnik staršyni Mahiloŭskaha abłvykankama apynuŭsia u SIZA KDB

Były namieśnik staršyni Mahiloŭskaha abłvykankama Hienadź Dzienhaloŭ byŭ zatrymany i ciapier utrymlivajecca ŭ SIZA KDB u Minsku, viadomym jak «amierykanka», paviedamlajuć krynicy «Radyjo Svaboda».

Hienadź Dzienhaloŭ

Pavodle infarmacyi krynic «Svabody», sprava, u miežach jakoj zatrymali Dzienhalova, źviazanaja ź finansami. Dakładnaja sutnaść pretenzij da byłoha čynoŭnika, artykuł Kryminalnaha kodeksa i jaho pracesualny status pakul nieviadomyja.

Taksama niajasna, kali mienavita jaho zatrymali. Apošnija publičnyja zhadki Hienadzia Dzienhalova na pasadzie namieśnika staršyni Mahiloŭskaha abłvykankama datujucca pačatkam žniŭnia 2025 hoda. 7 žniŭnia jon udzielničaŭ va ŭračystaściach da Dnia budaŭnika, a na 9 žniŭnia ŭ jaho była zapłanavanaja žyvaja telefonnaja linija. Paśla hetaha Dzienhaloŭ faktyčna źnik z publičnaj prastory.

15 studzienia 2026 hoda na jaho pasadu pa pytańniach budaŭnictva i ŽKH byŭ uzhodnieny Ihar Klišo. Kali mienavita Dzienhaloŭ pakinuŭ pasadu, publična nie paviedamlałasia.

Hienadź Dzienhaloŭ naradziŭsia ŭ 1973 hodzie ŭ Białyničach Mahiloŭskaj vobłaści i bolšuju častku karjery byŭ źviazany z budaŭničaj halinoj. Jon skončyŭ Mahiloŭski budaŭničy technikum, Biełaruskuju dziaržaŭnuju politechničnuju akademiju, a taksama Akademiju kiravańnia pry prezidencie.

U roznyja hady pracavaŭ u budaŭničych arhanizacyjach Mahiloŭščyny, uznačalvaŭ «Mahiloŭchimramont», kiravaŭ UKB Mahiloŭskaha harvykankama i Hałoŭnym upraŭleńniem kapitalnaha budaŭnictva Kiraŭnictva spravami prezidenta. Z 2015 hoda ŭznačalvaŭ «Minskabłsielbud».

U 2017 hodzie Dzienhaloŭ uznačaliŭ Barysaŭski rajvykankam. U mai 2022 hoda jaho ŭzhadnili na pasadu namieśnika staršyni Mahiloŭskaha abłvykankama pa pytańniach budaŭnictva i ŽKH. U studzieni 2026 hoda na hetu pasadu byŭ pryznačany Ihar Klišo.

Kamientary da artykuła