Stała viadoma, kudy pastupiŭ vučycca syn Makieja

Letaś letam Arciom Makiej dva tydni advučyŭsia ŭ Łonh-Ajłendskim univiersitecie (ZŠA). Ale, jak kaža jaho maci Viera Palakova-Makiej, viarnuŭsia i skazaŭ, što niepatrebny jamu toj Ńju-Jork. I znajšoŭ sabie alma-matar u Minsku.

Viera Palakova-Makiej z małodšym synam Arciomam Makiejem. Skrynšot storys u jaje instahramie

Sioleta małodšy syn pamierłaha ministra zamiežnych spraŭ Uładzimira Makieja i dyrektarki Teatra junaha hledača Viery Palakovaj-Makiej skončyŭ Minskuju mižnarodnuju himnaziju Iryny Abielskaj — adnu ź niešmatlikich pryvatnych ustanoŭ adukacyi, jakuju pakinuli ŭ žyvych.

Ščaślivaja maci apublikavała ŭ instahramie fotazdymak z Arciomam, jakoha ŭpryhožvała stužka «Vypusknik», i padpisała: «Synačka-karzinačka». 

Z hetaj nahody Viera Palakova tančyła ŭ baćkoŭskim fłešmobie: «Krychu zapalili na apošnim zvanku syna. Tak, ja maci i ŭmieju tančyć!». Ale ž pra płany chłopca na budučyniu ŭ instahramie raspaviadać nie stała.

Treba adznačyć, što raniej syn Makieja cikaviŭsia tvorčaściu. U 9 hadoŭ Arciom śpiavaŭ na tvorčym viečary maci. A ŭ 10 hadoŭ jon u składzie hurta «Niasumny ŭzrost» ź biełaruskamoŭnaj pieśniaj «Fajna» sprabavaŭ prabicca na dziciačaje «Jeŭrabačańnie».

Hurt nie zmoh vyjści navat u finał nacyjanalnaha adboru — Viera Palakova-Makiej tady abvinavaciła žury ŭ nieabjektyŭnaści. Ale praciahu historyja nie atrymała.

Na sustrečy sa svaimi prychilnikami aktrysa raspaviadała, što cikavaść da tvorčaści ŭ Arcioma raptam źnikła niedzie ŭ 15 hadoŭ.

«Jon skazaŭ: «Nie, ja nie chaču, ja pajdu na mižnarodnuju ekanomiku». Potym jon pamučyŭsia dva hady z matematykaj. Minułym letam byŭ za miažoju, paŭtara miesiaca, dalacieŭ navat da Ńju-Jorka. U Łonh-Ajłendskim univiersitecie pavučyŭsia dva tydni», — pryznałasia Viera. 

Dadała, što apłačvała hetuju vandroŭku razam sa starejšym synam Dźmitryjem (toj skončyŭ miedycynski ŭniviersitet) — i dla ich abaich heta była davoli składanaja zadača ŭ finansavym płanie. 

«Napružylisia vielmi finansava. My, praŭda, potym try miesiacy padciahvali pajasy ŭsio družna, tym nie mienš my zmahli. Ź Dzimam hanarymsia, što zmahli Arcioma adpravić tudy pavučycca. A jon viarnuŭsia, skazaŭ: «Nie. Chaču jak tata, na mižnarodnyja adnosiny». 

Padobna, taki šlach chłopiec u vyniku i vybraŭ. Arcioma Uładzimiraviča Makieja možna pabačyć u śpisie ludziej, jakija sioleta pastupili ŭ BDU. Adnak jaho imia źjaviłasia tam nie adrazu. Całkam mahčyma, što Arciom Makiej prabiŭsia tolki na płatnaje adździaleńnie.

«Naša Niva» adšukała chłopca na videa, jakoje pryśviečana Dniu pieršakurśnika na fakultecie mižnarodnych adnosin. 

Arciom Makiej (u centry) na fakultecie mižnarodnych adnosin

Nahadajem, 64‑hadovy Uładzimir Makiej naležaŭ da libieralnaha kryła łukašenkaŭcaŭ i byŭ adnym ź niamnohich u viarchušcy, chto čas ad času havaryŭ pa-biełarusku. U saviecki čas Makiej byŭ aficeram savieckaha HRU, u niezaležnaj Biełarusi jon pačaŭ dypłamatyčnuju karjeru. Na pasadu kiraŭnika Administracyi prezidenta i paźniej ministra zamiežnych spraŭ Makiej pryjšoŭ praz kabiniet asabistaha pamočnika Alaksandra Łukašenki, jaki zaniaŭ u 2000 hodzie — heta było paśla źniknieńnia Viktara Hančara i Juryja Zacharanki, u pierałomnym momancie ŭ charaktary biełaruskaha režymu.

U listapadzie 2022 hoda Uładzimir Makiej skončyŭ žyćcio samahubstvam.

Va Uładzimira było dva syny — małodšy Arciom i starejšy Vital (ad pieršaha šlubu).

U 2020 hodzie Vital Makiej zvolniŭsia ź Ministerstva zamiežnych spraŭ, što było ŭspryniata naziralnikami jak maŭklivy pratest suprać falsifikacyi vybaraŭ i hvałtu. U 2021 hodzie jon raskrytykavaŭ viedamstva svajho baćki za chamstva i stratu maralnych aryjenciraŭ. Ciapier u LinkedIn Vitala paznačana, što jon žyvie ŭ Polščy i źjaŭlajecca kiraŭnikom adździełu prodažu studyi «Kit».

Kamientary da artykuła