Finlandyja vydzielić dadatkovyja 100 tysiač jeŭra na dapamohu palitviaźniam
Na palach Hienieralnaj asamblei AAN u Ńju-Jorku Śviatłana Cichanoŭskaja praviała sustrečy ź ministarkaj zamiežnych spraŭ Finlandyi Elinaj Vałtanien i palityčnym dziaržaŭnym sakratarom MZS Pasi Rajałam, paviedamlaje pres-słužba demakratyčnaj lidarki.
Śviatłana Cichanoŭskaja z Elinaj Vałtanien, fota OSC
Paśla sustreč finski bok abviaściŭ pra dadatkovyja 100 tysiač jeŭra na dapamohu biełarusam, jakija paciarpieli ad represij. Srodki buduć nakiravanyja praź Mižnarodny humanitarny fond i biełaruskija pravaabarončyja arhanizacyi, jakija dapamahajuć palitviaźniam, vyzvalenym i ich siemjam. Fond pracuje praz pravieranyja partniorskija arhanizacyi i zabiaśpiečvaje finansavuju, pravavuju, psichałahičnuju i inšuju dapamohu paciarpiełym ad represij.
Heta ŭžo druhi ŭniosak Finlandyi ŭ Mižnarodny humanitarny fond. Novaja dapamoha asabliva važnaja na fonie novych vyzvaleńniaŭ: 16 vieraśnia ź biełaruskich turmaŭ vyjšli 25 palitviaźniaŭ, jakich vyvieźli ŭ Litvu, paviedamlaje pres-słužba Śviatłany Cichanoŭskaj.
Padčas sustreč taksama abmierkavali dalejšyja namahańni pa vyzvaleńni palitviaźniaŭ, situacyju biaśpieki ŭ Biełarusi i ryzyki dalejšaha ŭciahvańnia krainy ŭ rasijskuju vajnu suprać Ukrainy. Asobna ź dziaržaŭnym sakratarom Cichanoŭskaja ŭźniała prablemy biełarusaŭ, jakija žyvuć u Finlandyi, — praterminavanyja pašparty, dakumienty i lehalizacyja.
«Dziakuju Finlandyi za paśladoŭnuju salidarnaść ź biełarusami. Asabliva važna, što hetaja padtrymka pieratvarajecca ŭ kankretnuju dapamohu ludziam — palitviaźniam, vyzvalenym i siemjam represavanych. My pavinny być hatovyja da novych vyzvaleńniaŭ zahadzia, kab čałaviek, jaki vychodzić z turmy, adrazu atrymaŭ nieabchodnuju padtrymku», — adznačyła Śviatłana Cichanoŭskaja.