Alijeŭ paśla źniaćcia sankcyj z Usmanava pamiłavaŭ asudžanaha za špijanaž francuza

Prezident Azierbajdžana Ilcham Alijeŭ padpisaŭ ukaz ab pamiłavańni 20 asudžanych. Siarod ich — hramadzianin Francyi Marten Rajan, jakoha ŭ sakaviku 2026 hoda pryhavaryli da dziesiaci hadoŭ pazbaŭleńnia voli za špijanaž, a taksama hramadzianin Rasii i Izraila Kirył Michajłaŭ.

Marten Rajan

U śpisie pamiłavanych, akramia francuza — 15 hramadzian Azierbajdžana, dvoje hramadzian Turcyi, hramadzianka Pakistana i Kirył Michajłaŭ, jaki maje padvojenaje rasijska-izrailskaje hramadzianstva.

Jak paviedamili ŭ pres-słužbie azierbajdžanskaha prezidenta, Alijeŭ razhledzieŭ chadajnictvy ab pamiłavańni, padadzienyja samimi asudžanymi, ich siemjami i ŭpaŭnavažanym pa pravach čałavieka. Pry pryniaćci rašeńnia ŭličvalisia asoby źniavolenych, stan ich zdaroŭja, siamiejnaje stanovišča, charaktar złačynstvaŭ i stupień hramadskaj niebiaśpieki, terminy pakarańnia i pavodziny padčas adbyvańnia pakarańnia.

Martena Rajana zatrymali supracoŭniki Dziaržaŭnaj słužby biaśpieki Azierbajdžana ŭ Baku ŭ śniežni 2023 hoda. U sakaviku 2026 hoda sud pa ciažkich złačynstvach u Baku pryznaŭ jaho vinavatym pavodle artykuła 276 Kryminalnaha kodeksa Azierbajdžana — špijanažu — i pryznačyŭ dziesiać hadoŭ pazbaŭleńnia voli.

Pavodle viersii śledstva, Rajan źbiraŭ infarmacyju pra ŭzbrajeńnie i asabovy skład azierbajdžanskaj armii, a taksama inšyja źviestki, jakija mahli cikavić francuzskuju raźviedku. Jaho taksama abvinavacili ŭ atrymańni zadańniaŭ pa zbory infarmacyi pra supracoŭnictva i suviazi Azierbajdžana ź Vialikabrytanijaj, Ałžyram, Turcyjaj, Pakistanam, Iranam, Kitajem, Samali i krainami Centralnaj Azii.

Akramia taho, śledstva śćviardžała, što jon źbiraŭ źviestki pra płany vajskovaha supracoŭnictva, uzbrajeńnie i bojeprypasy, jakija ŭvozilisia ŭ Azierbajdžan. Pavodle hetaj viersii, Rajana pryciahnuli da tajnaha supracoŭnictva, a supracoŭniki Hałoŭnaha ŭpraŭleńnia źniešniaj biaśpieki Francyi (DGSE) vykarystoŭvali jaho jak ahienta-špijona.

Paśla hetaha ŭłady Azierbajdžana abviaścili supracoŭnikaŭ DGSE piersonami non hrata i vysłali ich z krainy.

Vyzvaleńnie francuza adbyłosia adrazu paśla taho, jak rasijskich miljarderaŭ Ališera Usmanava i Michaiła Frydmana padčas čarhovaha praciahvańnia jeŭrapiejskich sankcyj suprać Rasii vykraślili sa śpisaŭ. Prytym na hetym pieradusim nastojvała Francyja, jakaja nie stała publična abo pryvatna tłumačyć svaje matyvy, zajaviŭšy tolki, što pytańnie źviazanaje z «kankretnaj prablemaj nacyjanalnaj biaśpieki». Politico paviedamlała, što rašeńnie mahło być častkaj mahčymaj damoŭlenaści, u miežach jakoj Azierbajdžan vyzvaliŭ by zatrymanych francuzskich hramadzian. Prezident Azierbajdžana Ilcham Alijeŭ heta admaŭlaŭ i zajaŭlaŭ, što Baku i raniej vystupaŭ za vyklučeńnie Usmanava z sankcyjnaha śpisu.

Kamientary da artykuła