Biełaruska pierakładała dla prezidenta Ekvadora, pracavała ściuardesaj, a ciapier adkryła ŭ Mieksicy svaju moŭnuju škołu «Ruskaja z ruskaj»

Kali studentka Minskaha linhvistyčnaha ŭniviersiteta Nastaśsia Marozava pajechała na leta pracavać u dziciačy łahier u ZŠA, naŭrad ci jana mahła ŭjavić, što hetaja pajezdka ŭrešcie pryviadzie jaje ŭ Mieksiku. Ciapier biełaruska žyvie ŭ Pueble, maje tam ułasnuju moŭnuju škołu i rychtujecca atrymać mieksikanskaje hramadzianstva.

Nastaśsia Marozava ŭ rodnym horadzie. Fota: anastasiamarozava / Instagram

Nastaśsia Marozava vyrasła ŭ Žłobinie, a paśla škoły pajechała ŭ Minsk vučycca ŭ Linhvistyčnym univiersitecie. Dziaŭčyna vałodaje anhlijskaj i ispanskaj movami.

Jak zhadvaje Nastaśsia ŭ razmovie z žurnalistam mieksikanskaj haziety El Sol de Puebla, na apošnim kursie jana vyrašyła paŭdzielničać u studenckaj prahramie Work and Travel i pajechała na leta ŭ ZŠA. Padčas pracy ŭ dziciačym łahiery ŭ Paŭnočnaj Karalinie 21‑hadovaja dziaŭčyna paznajomiłasia z Fransiska Radryhiesam. Chłopiec byŭ jaje ravieśnikam, taksama pracavaŭ u łahiery i pryjechaŭ tudy ź mieksikanskaha horada Puebła, adnaho z najbujniejšych haradoŭ Mieksiki, raźmieščanaha prykładna za 100 kiłamietraŭ ad stalicy krainy, dzie vučyŭsia na jurysta.

Paśla zakančeńnia leta kožny viarnuŭsia ŭ svaju krainu, ale adnosiny praciahnulisia, maładyja jeździli adno da adnaho.

Tak na adlehłaści jany praviali kala dvuch hadoŭ. Paśla Fransiska pajechaŭ vučycca ŭ Madryd, i sustrakacca stała praściej. A zatym atrymaŭ stažyroŭku ŭ pasolstvie Mieksiki ŭ Maskvie, dzie para piać miesiacaŭ pražyła razam.

Kali stažyroŭka skončyłasia i chłopcu treba było viartacca dadomu, Nastaśsia pačała ŭsurjoz dumać, ci nie pierajechać joj u Mieksiku.

«Čamu b nie paznajomicca ź inšaj kulturaj, litaralna ź inšym śvietam i inšaj krainaj? Dyj lepš spaznać siabie. Bo heta nie prosta pajezdka za mužčynam, heta adkryćcio novych haryzontaŭ», — dzielicca dziaŭčyna svaimi tahačasnymi dumkami.

Nastaśsia i Fransiska. Fota: anastasiamarozava / Instagram

Ad dypłamatyi i avijacyi da moŭnaj škoły

U červieni 2019 hoda 24‑hadovaja Nastaśsia pierajechała ŭ Puebłu. Na toj momant jana ŭžo mieła salidny prafiesijny bekhraŭnd. Jana paśpieła papracavać pierakładčycaj dla dypłamatyčnych misij Ekvadora i Vieniesueły i navat pierakładała padčas vizitu delehacyi tahačasnaha prezidenta Ekvadora Rafaela Karea. Paźniej dziaŭčyna pracavała bortpravadnicaj u «Aerafłocie».

Adnak pracy na novym miescy nie było. Daviałosia pryvykać i da miascovaha ładu žyćcia. Nastaśsia kaža, što ź dziacinstva pryvykła surjozna stavicca da punktualnaści, abaviazkaŭ i damoŭlenaściaŭ. U Mieksicy jana sutyknułasia z bolš spakojnym staŭleńniem da taho, što płany mohuć źmianicca abo niešta pojdzie nie tak.

«Mnie było vielmi ciažka. Ale z časam ja zrazumieła miascovy pryncyp: kali niešta idzie nie pavodle tvajho płana — ničoha strašnaha. Nichto nie pamiraje. Ty prosta robiš vysnovy z pamyłak i idzieš dalej», — kaža dziaŭčyna.

U novaj krainie Nastaśsia vyrašyła pasprabavać zarablać tym, što dobra ŭmieła, i pačała vykładać ruskuju movu. Spačatku jana zarehistravałasia na płatformie dla repietytaraŭ SuperProf, dzie davała pryvatnyja ŭroki. Nieŭzabavie da vykładańnia ruskaj movy dla ispanamoŭnych dadałasia ispanskaja dla ruskamoŭnych mihrantaŭ, jakija tolki pierajechali ŭ Mieksiku.

U 2020 hodzie hetaja inicyjatyva pierarasła ŭ paŭnavartasny biznes — anłajn-škołu Ruso con Rusa — «Ruskaja z ruskaj».

Siońnia prajekt pracuje ŭžo piać z pałovaj hadoŭ. U kamandzie Nastaśsi piać vykładčyc. Dziaŭčyna praciahvaje vieści zaniatki, a taksama stvaraje materyjały i mietodyki, pa jakich pracuje škoła. Za hety čas jaje vučniami stali bolš za 330 čałaviek z Mieksiki, Čyli, Ekvadora, Arhienciny, Vieniesueły i Ispanii.

Ciapier Nastaśsia rychtujecca da ekzamienu na atrymańnie mieksikanskaha hramadzianstva. Za siem hadoŭ, pa słovach dziaŭčyny, Puebła stała dla jaje domam: tut jana žyvie z mužam, raźvivaje svaju škołu i źviazvaje z hetym horadam budučyniu.

«Maje dzieci narodziacca tut», — zapeŭnivaje biełaruska.

Kamientary da artykuła