U Kazachstanie paśla hibieli vajskoŭcaŭ na Kaśpii zatrymali načalnika štaba VMS i jašče čatyroch kamandziraŭ. Strašnyja kadry abviaščeńnia śpisu zahinułych

U Kazachstanie zatrymali piaciarych pradstaŭnikoŭ vyšejšaha i starejšaha kamandnaha składu Uzbrojenych sił krainy pa spravie ab hibieli 14 vajskoŭcaŭ padčas vučeńniaŭ na Kaśpijskim mory.

MUS Respubliki Kazachstan

Jak paviedamili ŭ Ministerstvie ŭnutranych spraŭ Kazachstana, status padazravanych atrymali načalnik štaba i pieršy namieśnik hałoŭnakamandujučaha Vajskova-marskich sił Kazachstana, dva kamandziry vajskovych čaściej, kamandzir roty marskoj piachoty i kamandzir katara. Ich źmiaścili ŭ izalatar časovaha ŭtrymańnia ŭ horadzie Aktau.

Rasśledavańnie viadziecca pa artykułach ab chałatnym staŭleńni da słužby i parušeńni praviłaŭ kiravańnia sudnam, jakoje pryviało da hibieli ludziej. Trahiedyja adbyłasia padčas vučeńniaŭ «Chazar Qorğany — 2026» prykładna za 43 kiłamietry ad Aktau.

Fota: Kazakh Ministry of Defense/Anadolu via Getty Images

Pavodle śledstva, 24 vieraśnia padčas vysadki vajskoŭcaŭ z katara «Qajsar» u niespryjalnych umovach nadvorja ludziej źniesła ŭ mora. Kazachstanskija siłavyja struktury vyśviatlajuć, jak prymalisia rašeńni ab arhanizacyi i praviadzieńni vučebna-bajavoha zadańnia, ci ŭličvaŭsia prahnoz nadvorja, ci vykonvalisia patrabavańni biaśpieki i ŭ jakim techničnym stanie znachodziŭsia katar.

Spačatku paviedamlałasia, što ŭ adkrytaje mora padčas vučeńniaŭ u Manhistaŭskaj vobłaści źniesła 19 vajskoŭcaŭ. Paźniej Ministerstva abarony ŭdakładniła, što havorka išła pra 17 čałaviek. Troch vajskoŭcaŭ udałosia vyratavać, jašče 14 zahinuli.

25 vieraśnia prezident Kazachstana Kasym-Žamart Takajeŭ abviaściŭ u krainie dzień ahulnanacyjanalnaj žałoby. 

Kamientary da artykuła