Na prypynkavych paviljonach u Minsku dadaduć novyja aharodžy
Da kanca 2026 hoda ŭ Minsku płanujuć abstalavać dadatkovymi bakavymi aharodžami prypynkavyja paviljony novaha typu. Pra heta paviedamili ŭ HPA «Harremaŭtadar Minharvykankama», piša ahienctva «Minsk-Naviny».
Zdymak ilustracyjny. Fota: «Minsk-Naviny»
Paviljony takoha ŭzoru pačali stavić na prypynkach hramadskaha transpartu ŭ 2023 hodzie. Adnak z nadychodam vosieńskich daždžoŭ jany vyklikajuć krytyku ŭ sacyjalnych sietkach.
Pasažyry adznačali, što kanstrukcyi niedastatkova abaraniajuć ad daždžu i vietru. Niekatoryja taksama ličać, što staryja paviljony lepš vykonvali funkcyju abarony ad niepahadzi.
U «Harremaŭtadary» raskazali, što ŭdaskanaleńniem novych paviljonaŭ zajmajucca jašče z 2025 hoda. Kab pasažyry mahli lepš abaranicca ad apadkaŭ padčas čakańnia transpartu, paviljony abstaloŭvajuć dadatkovymi bakavymi pieraharodkami. Za minuły hod pastavili 246 takich aharodžaŭ. Całkam madernizacyju płanujuć zaviaršyć da kanca śniežnia 2026 hoda.
Paralelna ŭ Minsku praciahvajecca zamiena starych i znošanych prypynkavych paviljonaŭ na novyja, vykananyja ŭ adzinym architekturnym styli. Štohod z 2023 hoda ŭ miežach biahučaha ramontu mianiajuć kala 200 paviljonaŭ.
U «Harremaŭtadary» adznačyli, što z 2023 pa 2025 hod u Minsku ŭžo ŭstalavali 547 paviljonaŭ novaha typu. Pastupova płanujecca zamianić usie sastarełyja kanstrukcyi na prypynkach.
Čytajcie taksama:
Samy zahadkavy aŭtobusny maršrut Minska źniknie
U Minsku źmieniacca maršruty niekatorych aŭtobusaŭ
U minskim tramvai svarka dvuch mužčyn skončyłasia panažoŭščynaj
Pamiž Minskam i Maładziečnam zapuskajuć paskoranyja elektryčki