«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii

Biełarusa Lva Michiejeva, jaki 5 hadoŭ da taho žyŭ u Hruzii, 25 vieraśnia miascovyja ŭłady zatrymali i vysłali ŭ Armieniju. Na armianskaj miažy jaho taksama zatrymali praź miždziaržaŭny vyšuk pa zapycie biełaruskich uładaŭ, ale ŭžo na druhi dzień vyzvalili. Paśla vychadu z armianskaj palicyi (heta adbyłosia paśla abiedu 26 vieraśnia) Leŭ raskazaŭ vydańniu «Pozirk», jak heta adbyvałasia. 

Leŭ Michiejeŭ kala budynka parłamienta Hruzii. Fota z asabistaha archiva

— Kali vas zatrymali paŭtorna?

— Bližej da 11‑j viečara ( 10‑j pa minskim časie. — «Pozirk»). My tam dastatkova doŭha rabili vopis rečaŭ, papier. A ŭ mianie tam dźvie sumki, jakija ja zabraŭ. Ale nijakich pretenzij u mianie niama, było vielmi vietlivaje, karektnaje, uvažlivaje staŭleńnie. I nie biez humaru.

Dzieści a 3‑j nočy my skončyli, ja pajšoŭ spać u kamieru. U 14.20 pryblizna mianie adpuścili. Padpisaŭ papiery, mnie viarnuli pašpart, usie rečy. Papieru pra vyzvaleńnie dali, na armianskaj movie.

— Vam patłumačyli, čamu adpuskajuć?

— Da mianie nijakich pretenzij niama. Ja mahu pa terytoryi Armienii spakojna pieramiaščacca. Adzinaje, što nie mahu vyjazdžać, dla vyjezdu patrebnaja niejkaja inšaja pracedura.

— To-bok atrymlivajecca, što historyja jašče nie zaviaršyłasia.

— Nie da kanca, tak. Nu, heta, vidać, standartnaja pracedura. Usio ž byŭ zapyt [ź Minska] na maju ekstradycyju. Heta adździaleńnie palicyi nie vyrašaje, nie jaho paŭnamoctvy. Mianie prosta vyzvalili biez usialakich pretenzij, a ŭžo pa vyjeździe z krainy bolš vysokaja instancyja vyrašaje.

— Jak płanujecie dziejničać?

— Zaraz ačomajusia paśla hetaha ŭsiaho. U hateli numar źniaŭ. Treba prosta ahledziecca, nakolki Armienija padychodzić: ci tut zapytvać prytułak, ci ŭsio ž taki ŭžo ŭ Jeŭropu pierabiracca. Pakul mnie składana dać kankretny adkaz.

U palicyi bačyli, što heta palityčny pieraśled. Mnie pakazali artykuły [Kryminalnaha kodeksa], pa jakich mianie pieraśledujuć. Ubačyŭ, što za «abrazu Łukašenki». Ja kažu: «Viedajecie, Łukašenka nie prezident». Jany tak uśmichnulisia, kiŭnuli. To-bok jany taksama hetuju situacyju razumiejuć.

Kali składali dakumienty, palismien asabliva padkreśliŭ, što ja biez kryminalnaha minułaha. Ja im pakazaŭ daviedku ź Biełarusi pra niesudzimaść. Karniki ŭmudrylisia mnie jaje vydać za 3 dni da pieratrusu i za 10 dzion da majho vyletu ŭ Hruziju.

— Pra što vas raspytvali?

— U ahulnych rysach: «A što ž ty tam takoje natvaryŭ?» Ja kažu: «Pišu, havaru». Pra toje, što jość hety režym, što vajna — heta drenna. Što vajna — heta nie mir. To-bok jany ź ciažkaściu razumiejuć, za što mianie pieraśledujuć. Ja vielmi rady, što tak chutka vyzvalili. Užo dumaŭ, što pryjdziecca siadzieć i siońnia, i zaŭtra.

— Dzie vy zaraz znachodziciesia?

— Za 200 km ad Jerevana. Na prapusknym punkcie mianie adrazu pasadzili ŭ bus i pryvieźli ŭ adździaleńnie. Zaŭtra na maršrutku ŭ Jerevan, jana raz na dzień chodzić.

Kali viarnucca va ŭčarašni dzień… Heta byŭ kankretny momant cisku, vybar biez vybaru. Mianie napałochaŭ varyjant, pry jakim krainu pryznačeńnia vybirali b jany. Naprykład, Kazachstan ci Azierbajdžan. Tamu pahadziŭsia na Armieniju.

Tut samaje niepryjemnaje — voś heta biaspraŭje i prynižeńnie čałavieka, jaki ničoha nie ździejśniŭ supraćzakonnaha. U mianie ŭsie hruzinskija siabry płačuć litaralna, usie ŭ šoku. Jak heta tak? Ja tam piać hadoŭ pražyŭ, suviazi vielmi hłybokija, tryvałyja, asabistyja.

Tym časam MUS Hruzii adreahavała na šyroki rezanans, jaki atrymała vydvareńnie z krainy Lva Michiejeva, i dało svajo tłumačeńnie pa situacyi, piša «Pozirk». Apublikavanuju infarmacyju pa spravie Michiejeva viedamstva nazvała «skažonaj i niapravilna vytłumačanaj».

«Pa-pieršaje, my chacieli b udakładnić, što ŭ Departamiencie mihracyi Ministerstva ŭnutranych spraŭ stasunki z zamiežnym hramadzianinam, jaki nie razmaŭlaje pa-hruzinsku, ažyćciaŭlajecca z udziełam pierakładčyka. U pryvatnaści, u pracesie aznajamleńnia asoby z dakumientami i ich padpisańnia adpaviednaja infarmacyja pierakładajecca i tłumačycca na zrazumiełaj jamu movie. Adpaviedna, raspaŭsiudžanaja infarmacyja ab tym, što Lva Michiejeva prymušali padpisvać dakumienty, składzienyja na hruzinskaj movie, jakija byli jamu niezrazumiełyja, biez nadańnia jamu jakoj-niebudź infarmacyi pra ich źmiest, nie adpaviadaje rečaisnaści», — havorycca ŭ zajavie viedamstva (raniej u kamientary «Pozirku» Michiejeŭ zajaviŭ, što pierakładčyk byŭ, ale sens papier na hruzinskaj movie, pradstaŭlenych dla padpisańnia, zastaŭsia niezrazumiełym).

Pavodle śćviardžeńnia MUS, pierad padpisańniem dakumientaŭ Michiejevu «była nadadzienaja adpaviednaja infarmacyja praź pierakładčyka, i jamu byŭ rastłumačany ich źmiest».

«My taksama chacieli b udakładnić, što pieravozka zamiežnych hramadzian da adpaviednaha pahraničnaha punkta ažyćciaŭlajecca śpiecyjalna vydzielenymi transpartnymi srodkami supravadžeńnia. Lva Michiejeva pieravozili niepasredna na aŭtamabili marki «Ivieka» 2025 hoda vypusku», — adznačajecca ŭ relizie (biełarus nazvaŭ aŭtamabil aŭtazakam).

MUS paviedamlaje, što Michiejeŭ źviarnuŭsia ŭ Departamient mihracyi z prośbaj dać mižnarodnuju abaronu ŭ 2021 hodzie, źviazaŭ heta z «palityčnaj dziejnaściu ŭ Respublicy Biełaruś».

Departamient mihracyi «razhledzieŭ spravu ŭ adpaviednaści sa standartami, ustanoŭlenymi zakonam Hruzii ab mižnarodnaj abaronie, i 27 vieraśnia 2024 hoda admoviŭ Lvu Michiejevu ŭ nadańni mižnarodnaj abarony, pakolki, zhodna z rašeńniem departamienta, nie było zakonnych padstaŭ dla nadańnia praduhledžanaha zakonam statusu».

Michiejeŭ «abskardziŭ hetaje rašeńnie ŭ tbiliskim haradskim i apielacyjnym sudach». «Abodva sudy pakinuli ŭ mocy rašeńnie Departamienta mihracyi. Adpaviedna, z 29 červienia 2026 hoda Leŭ Michiejeŭ bolš nie ličyŭsia prośbitam prytułku ŭ Hruzii», — arhumientavała MUS status Michiejeva jak nielehała.

Kamientary da artykuła