Nietańjachu tajemna lataŭ u AAE

Abjadnanyja Arabskija Emiraty paćvierdzili, što premjer-ministr Izraila naviedaŭ krainu ŭ niadzielu i sustreŭsia z prezidentam Muchamiedam bien Zaidam.

Bińjamin Nietańjachu. Fota: AP Photo / Oded Balilty, File

Pavodle infarmacyi ananimnych krynic niekalkich ŚMI, kiraŭnik urada mieŭ namier asabista paprasić bien Zaida abvierhnuć paviedamleńni pra toje, što toj papiaredžvaŭ Nietańjachu ab napadzie CHAMAS pierad uvarvańniem 7 kastryčnika 2023 hoda, piša Bi-bi-si.

Źviestki pra toje, što AAE papiaredžvali premjera ab napadzie, upieršyniu apublikavała levaja izrailskaja hazieta «Chaarec» jašče ŭ pačatku vieraśnia. Paśla publikacyi Nietańjachu paabiacaŭ padać na hazietu ŭ sud.

Zaraz izrailski kanał Channel 12 paviedamiŭ, što kala 12:00 u niadzielu Nietańjachu i asoby, jakija jaho supravadžali, vylecieli pryvatnym samalotam u Abu-Dabi i praviali ŭ AAE kala čatyroch hadzin.

Pavodle niekatorych źviestak, jaho sustreča z Muchamiedam bien Zaidam adbyłasia niepasredna ŭ aeraporcie Abu-Dabi.

U paniadziełak viečaram aficyjnaje infarmacyjnaje ahienctva AAE paviedamiła, što vizit sapraŭdy adbyŭsia, i baki «abmierkavali dvuchbakovyja adnosiny pamiž Abjadnanymi Arabskimi Emiratami i Izrailem, a taksama šlachi ich umacavańnia i raźvićcia».

Pajezdka adbyłasia na fonie skandału ŭ Izraili z-za paviedamleńniaŭ pra toje, što lidar AAE papiaredžvaŭ Nietańjachu ab pahrozie prykładna za paŭtara tydnia da napadu CHAMAS.

Pra toje, što zadačaj premjera była prośba ab abviaržeńni, siarod inšych pišuć izrailskija ŚMI i ahienctva Associated Press.

Akramia taho, amierykanskija Wall Street Journal i The Atlantic paviedamlali pra niekalki inšych papiaredžańniaŭ, u tym liku z boku byłoha kiraŭnika jehipieckaj raźviedki, jakija pastupili ŭsiaho za niekalki dzion da ataki.

Kancylaryja Nietańjachu z samaha pačatku rašuča admaŭlaje, što atrymlivała pa jakich-niebudź kanałach papiaredžańni ab rychtavanym napadzie.

Dakładna nieviadoma, ci sapraŭdy Nietańjachu prasiŭ prezidenta AAE abvierhnuć hetyja paviedamleńni. Adnak izrailskija palitołahi adznačajuć, što taki krok byŭ by całkam zrazumiełym u suviazi z nabližeńniem parłamienckich vybaraŭ u Izraili, jakija i biez hetaha skandału buduć dla premjera vielmi składanymi.

Vybary adbuducca 27 kastryčnika (pry ŭmovie, što situacyja ź biaśpiekaj nie pieraškodzić adkryć vybarčyja ŭčastki).

«Unutranaja sprava Izraila»

Jašče dniom u paniadziełak Ministerstva zamiežnych spraŭ AAE admaŭlałasia kamientavać paviedamleńni pra niadzielnuju sustreču Nietańjachu ź bien Zaidam. Pry hetym u viedamstvie zajavili, što padtrymlivajuć ź Izrailem «adkrytyja i pramyja kanały suviazi» i pieradajuć jamu «ŭsiu raźviedvalnuju infarmacyju, jakaja maje značeńnie».

Pavodle źviestak krynic žurnalistaŭ u AAE, kraina ličyć situacyju sa skandałam u presie častkaj unutranaj palityki Izraila i nie choča ŭ jaje ŭmiešvacca, asabliva napiaredadni vybaraŭ.

Ofis premjer-ministra nie kamientavaŭ ni źviestki pra pajezdku ŭ AAE, ni jaje metu. Ale ŭ paniadziełak sam Nietańjachu apublikavaŭ u sacsietcy X abviaržeńnie paviedamleńniaŭ pra jaho mierkavanyja kantakty z kiraŭnikom jehipieckaj raźviedki Abasam Kamielem pierad uvarvańniem CHAMAS.

«Na praciahu niekalkich miesiacaŭ, jakija papiaredničali 7 kastryčnika, premjer-ministr Nietańjachu nie sustrakaŭsia i nie razmaŭlaŭ z Abasam Kamielem, jaki ŭ toj čas uznačalvaŭ Hałoŭnaje raźviedvalnaje ŭpraŭleńnie Jehipta. Nivodzin pradstaŭnik izrailskaj raźviedki taksama nie pieradavaŭ premjer-ministru papiaredžańniaŭ z boku Jehipta», — napisaŭ jon.

Nietańjachu zajaviŭ, što maje namier padać pazoŭ ab paklopie, piša Times of Israel, adnak nie ŭdakładniŭ, suprać kaho mienavita. Raniej jaho kancylaryja ŭžo pahražała sudovymi iskami šerahu ŚMI i žurnalistaŭ z-za publikacyj, jakija jana ličyła paklopnickimi.

Premjer-ministr taksama zajaviŭ, što nikoli nie sustrakajecca z kiraŭnikami zamiežnych śpiecsłužbaŭ biez prysutnaści ich izrailskich kaleh.

Što pra abvinavačańni kaža Nietańjachu

Bińjamin Nietańjachu paśladoŭna abvinavačvaje levyja ŚMI Izraila ŭ razhortvańni suprać jaho kampanii pa ačarnieńni.

Jon taksama ličyć, što varoža nastrojenyja da jaho vydańni sprabujuć uskłaści na jaho «adkaznaść za ŭsie pravały i złačynstvy [byłoha kiraŭnika Šyn-Bet] Roniena Bara napiaredadni 7 kastryčnika».

Pavodle jaho słoŭ, u noč na 7 kastryčnika Bar, tahačasny načalnik Hienštaba Armii abarony Izraila hienierał-lejtenant Hiercy Chalevi i kiraŭnik vajennaj raźviedki hienierał-major Aaron Chaliva «abmierkavali ŭsie tryvožnyja sihnały», piša Times of Israel.

«Niahledziačy na heta, Ronien Bar vyrašyŭ nie telefanavać premjer-ministru i nie infarmavać jaho, nie pryvodzić u stan hatoŭnaści atrady hramadzianskaj samaabarony i padraździaleńni CACHAŁ na miescach, nie evakuiravać udzielnikaŭ fiestyvalu Nova, a zamiest hetaha tolki nakiravać nievialikuju hrupu elitnaha antyterarystyčnaha padraździaleńnia Tequila — što dakazvaje, što jon viedaŭ pra realnuju niebiaśpieku», — zajaviŭ Nietańjachu.

Nietańjachu ličyć, što arabskija krainy, jakija śćviardžajuć, što pra niešta jaho papiaredžvali, mohuć pieraśledavać svaju metu — zrynuć jaho pravy ŭrad i pryvieści da ŭłady jahonych supiernikaŭ na vybarach Hadzi Ajzienkota, Jaira Hołana i Avihdora Libiermana.

Pavodle słoŭ premjera, taki ŭrad «sydzie z Hazy, Livana, Siryi, Iudziei i Samaryi i stvoryć paleścinskuju dziaržavu». «Voś u čym zaklučajecca vybar na hetych vybarach: albo pravyja, albo Paleścina», — śćviardžaje jon.

Značnaja častka izrailskaha hramadstva niezadavolenaja tym, što Nietańjachu admaŭlajecca ad prapanovy Viarchoŭnaha suda stvaryć niezaležnuju kamisiju pa rasśledavańni trahiedyi 7 kastryčnika, nadzielenuju samymi šyrokimi śledčymi paŭnamoctvami.

Premjer-ministr ličyć, što takaja kamisija budzie zahadzia praduziata nastrojenaja suprać urada. Jon vystupaje za stvareńnie inšaj kamisii, členaŭ jakoj pryznačać deputaty, a jaje paŭnamoctvy i ramki rasśledavańnia vyznačać palityki.

Kamientary da artykuła