Jehipiet papiaredžvaŭ Nietańjachu pra mahčymy napad z Hazy za niekalki dzion da 7 kastryčnika
Padobnyja sihnały pastupali i z Abjadnanych Arabskich Emirataŭ.
7 kastryčnika 2023 hoda bajeviki CHAMAS i inšych paleścinskich hrupovak prarvalisia ź siektara Haza na poŭdzień Izraila. U vyniku napadu zahinuli kala 1200 čałaviek, jašče kala 250 byli zachopleny ŭ zakładniki. Ataka stała pačatkam vajny ŭ Hazie.
Jak paviedamlaje The Wall Street Journal sa spasyłkaj na čynoŭnikaŭ adnoj z arabskich dziaržaŭ i inšych surazmoŭcaŭ, znajomych ź situacyjaj, u pačatku kastryčnika 2023 hoda kiraŭnik jehipieckaj vyviedki Abas Kamiel patelefanavaŭ izrailskamu premjeru i papiaredziŭ pra prykmiety mahčymaha napadu z Hazy.
Papiaredžańnie nie ŭtrymlivała dakładnaj infarmacyi pra čas i maštab mahčymaha napadu. Adnak, pavodle krynic haziety, heta byŭ užo treci sihnał, jaki Jehipiet pieradaŭ izrailskamu boku za niekalki miesiacaŭ.
Pieršaje, davoli ahulnaje papiaredžańnie pastupiła jašče ŭ červieni 2023 hoda. Jehipieckija pradstaŭniki tady kazali, što situacyja ŭ Hazie stanovicca niestabilnaj, i raili Izrailu adnavić pieramovy z CHAMAS.
U vieraśni Kamiel sam prylacieŭ u Izrail užo z bolš surjoznym papiaredžańniem. Pavodle krynic WSJ, jon kazaŭ izrailskim čynoŭnikam, što situacyja ŭ Hazie stała krytyčnaj i moža vyjści z-pad kantrolu. U adkaz jamu zajavili, što situacyja pad kantrolem.
Apošni ź viadomych sihnałaŭ prahučaŭ za niekalki dzion da 7 kastryčnika, kali Kamiel źviazaŭsia niepasredna z ofisam Nietańjachu. Adzin z surazmoŭcaŭ haziety śćviardžaje, što jehipcianie praciahvali papiaredžvać Izrail navat za 48 hadzin da napadu.
Pra toje, što Jehipiet papiaredžvaŭ Izrail napiaredadni ataki, havaryli i raniej. U 2023 hodzie staršynia kamiteta Pałaty pradstaŭnikoŭ ZŠA pa zamiežnych spravach Majkł Makoł zajaŭlaŭ, što jehipiecki bok papiaredziŭ Izrail prykładna za try dni da napadu. Ale pra asabisty zvanok Kamiela Nietańjachu, jak piša WSJ, raniej nie paviedamlałasia.
Padobnyja sihnały, pavodle krynic vydańnia, pastupali i z Abjadnanych Arabskich Emirataŭ. Jašče ŭ vieraśni 2023 hoda prezident AAE Muchamied ibn Zaid al-Nachajan nibyta kazaŭ Nietańjachu pra prykmiety padrychtoŭki CHAMAS da napadu. Arabskija śpiecsłužby źviartali ŭvahu na źmienu rytoryki tahačasnaha lidara CHAMAS u Hazie Jachji Sinvara i častyja sustrečy pradstaŭnikoŭ hrupoŭki i «Isłamskaha džychadu».
Nietańjachu admaŭlaŭ, što asabista atrymlivaŭ takoje papiaredžańnie ad prezidenta AAE. Jaho ofis taksama raniej zajaŭlaŭ, što ŭ miesiacy pierad 7 kastryčnika razmoŭ pamiž premjeram i kiraŭnikom jehipieckaj raźviedki nie było.
Papiaredžańni byli i ŭnutry Izraila
Novaja infarmacyja dapaŭniaje ŭžo viadomyja fakty pra papiaredžalnyja sihnały, jakija izrailskija struktury atrymlivali pierad 7 kastryčnika.
Izrailskaja armija mieła dakumient z płanam uvarvańnia CHAMAS, ale paličyła taki scenar nierealistyčnym. Žančyny-naziralnicy, jakija słužyli na miažy z Hazaj, paviedamlali pra ŭzmacnieńnie trenirovak bajevikoŭ, ale ich papiaredžańni taksama nie pryviali da naležnaj reakcyi. Akramia taho, u izrailskaj słužby ŭnutranaj biaśpieki «Šyn-Bet» nie chapała ahienturnych krynic u Hazie, jakija mahli b zahadzia raskryć płany CHAMAS.
Novyja źviestki ŭzmacniajuć krytyku na adras izrailskaha premjera na fonie nabližeńnia parłamienckich vybaraŭ. Apazicyja abvinavačvaje jaho ŭ fanaberystaści i złačynnaj nieabačlivaści, jakaja pryviała da najbujniejšaj trahiedyi ŭ historyi krainy. U svaju čarhu Nietańjachu ŭskładaje adkaznaść na kiraŭnictva siłavych struktur i śćviardžaje, što jany schavali ad jaho žyćciova važnuju infarmacyju.
U toj ža čas analityki adznačajuć, što prablema była nie tolki ŭ premjery, ale i ŭ sistemnaj pamyłcy ŭsiaho izrailskaha aparatu biaśpieki. U vajskovych i raźviedvalnych kołach panavała hłybokaja ŭpeŭnienaść u tym, što CHAMAS nie advažycca na bujnuju ataku.
Kamientary