Były palitviazień Andrej Alaksandraŭ atrymaŭ mižnarodnuju premiju
Miedyjamieniedžar i były palitviazień Andrej Alaksandraŭ atrymaŭ premiju Free Media Awards 2026. Uznaharodu jamu ŭručyli na cyrymonii ŭ Muziei Munka ŭ Osła, paviedamlaje vydańnie «Pozirk».
Andrej Alaksandraŭ (źleva) u Osła z palityčnym analitykam Alaksandram Kłaskoŭskim, jaki atrymaŭ hetuju samuju premiju ŭ 2014 hodzie. Fota z fejsbuk-staronki Alaksandra Kłaskoŭskaha
Padčas svajho vystupu Alaksandraŭ nahadaŭ, što niezaležnaja žurnalistyka faktyčna vyciaśniajecca ź Biełarusi. Biełaruskija žurnalisty sutykajucca z represijami: častka ź ich apynajecca za kratami, inšyja vymušanyja pracavać u vyhnańni.
Andrej Alaksandraŭ adznačyŭ, što niezaležnyja miedyja praciahvajuć pracu, bo svabodnaje słova maje žyćciova važnaje značeńnie dla hramadstva. Pavodle jaho, zadača žurnalistaŭ — źbirać i praviarać fakty, adroźnivać ich ad prapahandy i dapamahać ludziam atrymlivać abjektyŭnuju infarmacyju.
Atrymlivajučy ŭznaharodu, jon pryśviaciŭ jaje svaim kaleham, jakija praciahvajuć žurnalisckuju pracu ŭ vyhnańni abo znachodziacca ŭ źniavoleńni. Alaksandraŭ taksama nahadaŭ, što ŭ Biełarusi pa-raniejšamu zastajucca za kratami 15 pradstaŭnikoŭ miedyjaśfiery.
Pra toje, što Alaksandraŭ abvieščany łaŭreatam premii Free Media Awards 2026 hoda, stała viadoma 4 vieraśnia, kali sam jon byŭ jašče za kratami. Arhanizatary premii — Fondy Fritt Ord i Zeit Stiftung Bucerius — padkreślili, što svajoj papiaredniaj pracaj u BiełaPAN i Biełaruskaj asacyjacyi žurnalistaŭ toj «dapamoh umacavać prafiesijnyja standarty žurnalistyki, padtrymać niezaležnyja ŚMI i pabudavać mižnarodnyja sietki žurnalistaŭ i pravaabaroncaŭ».
Razam z Alaksandravym uznaharodaj uhanaravany kiraŭnik adździeła žurnalisckich rasśledavańniaŭ vydańnia «Ukrainskaja praŭda» Michaił Tkač (u piersanalnaj jakaści), redakcyi hruzinskaha vydańnia iFact, armianskaha telekanała Factor TV i rasijskaha niezaležnaha vydańnia «Vierstka».
Biełaruskija žurnalisty rehularna stanoviacca łaŭreatami premii. U 2021 hodzie ŭsie ŭznaharody Free Media Awards byli prysudžany tolki pradstaŭnikam Biełarusi ŭ znak salidarnaści z razhromlenymi niezaležnymi ŚMI. Tady łaŭreatami stali partał tut.by, Biełaruskaja asacyjacyja žurnalistaŭ, Kaciaryna Barysievič, Natalla Łubnieŭskaja, Darja Čulcova i Kaciaryna Andrejeva.