Mierc: SPA — samaje słaboje miesca Ukrainy, ale my šukajem rašeńni

Fiederalny kancler Hiermanii Frydrych Mierc zajaviŭ, što Hiermanija razam z partniorami šukaje mahčymaści dla ŭzmacnieńnia supraćpavietranaj abarony Ukrainy. Pavodle jaho słoŭ, mienavita SPA ciapier źjaŭlajecca samym słabym miescam ukrainskaj abarony, piša Deutsche Welle.

Frydrych Mierc. Fota: AP Photo/Matthias Schrader

Na bryfinhu ŭ Bierlinie 29 vieraśnia Mierc paviedamiŭ, što ŭ asabistych razmovach z kiraŭnikami roznych dziaržaŭ i ŭradaŭ sprabuje damahčysia dadatkovych pastavak srodkaŭ supraćpavietranaj abarony dla Ukrainy. Jon padkreśliŭ, što važna padrychtavać krainu da budučaj zimy, u tym liku z punktu hledžańnia zabieśpiačeńnia enierhasistemy.

Pavodle słoŭ niamieckaha kanclera, Hiermanija i inšyja jeŭrapiejskija krainy taksama intensiŭna kansultujucca nakont dalejšaj dapamohi Ukrainie napiaredadni pasiadžeńnia Jeŭrapiejskaj rady, jakoje zapłanavana na 15—16 kastryčnika ŭ Brusieli. Abmiarkoŭvajecca kankretnaja padtrymka ŭkrainskaha biudžetu i vykarystańnie ŭsich mahčymaściaŭ dla ŭzmacnieńnia SPA.

Mierc zajaviŭ, što nie varta mieć iluzij adnosna dalejšaha raźvićcia vajny. Pavodle jaho słoŭ, Rasija budzie praciahvać ataki na cyvilnuju infrastrukturu Ukrainy. Kancler nazvaŭ takija dziejańni vajennymi złačynstvami i padkreśliŭ, što Hiermanija praciahnie padtrymlivać Ukrainu, pakolki ličyć jaje častkaj Jeŭropy.

Jon taksama zajaviŭ, što zrabiŭ by ŭsio mahčymaje, kab dapamahčy Ukrainie pieražyć, najchutčej, vielmi ciažkuju zimu.

Akramia taho, Mierc prakamientavaŭ sustreču ministraŭ zamiežnych spraŭ Hiermanii i Rasii, jakaja adbyłasia 26 vieraśnia ŭ Ńju-Jorku. Pa jaho słovach, dalejšyja zajavy rasijskaha boku śviedčać pra toje, što Maskva pakul nie zacikaŭlenaja ŭ surjoznych i kanstruktyŭnych pieramovach ab spynieńni vajny va Ukrainie.

Kamientary da artykuła