«Katastrofa». Partyja Mierca nie prajšła ŭ parłamient u Piaredniaj Pamieranii

U Hiermanii ŭčora prajšło hałasavańnie na dvuch rehijanalnych vybarach — u Bierlinie i ŭ ziamli Mieklenburh — Piaredniaja Pamieranija. Partyja «Alternatyva dla Hiermanii» (AdH), jakaja nabiraje siłu, dabiłasia čarhovaha pośpiechu. U toj ža čas Chryścijanska-demakratyčny sajuz (CHDS) kanclera Frydrycha Mierca, pavodle danych vybarčaj kamisii, na vybarach u ziamielny parłamient Mieklenburha — Piaredniaj Pamieranii nie zmoh pieraadoleć 5‑pracentny barjer, nieabchodny dla atrymańnia mandataŭ u parłamiencie, piša Bi-bi-si.

CHDS nikoli raniej nie atrymlivaŭ nastolki nizkaha vyniku ni na ziamielnych, ni na fiederalnych vybarach.

Jak piša niamieckaje infarmacyjnaje ahienctva dpa sa spasyłkaj na danyja vybarčaj kamisii ziamli Mieklenburh — Piaredniaja Pamieranija, AdH pieramahła na vybarach u miascovy ziamielny parłamient, nabraŭšy kala 38,2% hałasoŭ i apiaredziŭšy levacentrysckuju Sacyjał-demakratyčnuju partyju (SDPH), jakaja atrymała 35,5%.

Chryścijanska-demakratyčny sajuz (CHDS) Mierca atrymaŭ tolki 4,9% hałasoŭ. Heta aznačaje, što CHDS nie pieraadolvaje 5‑pracentny barjer, nieabchodny dla atrymańnia miescaŭ u parłamiencie.

Jak piša dpa, CHDS, jaki doŭhi čas zastavaŭsia najbujniejšaj partyjaj paślavajennaj Hiermanii, raniej nikoli nie apuskaŭsia nižej za 5‑pracentny barjer ni na ziamielnych, ni na jeŭrapiejskich, ni na fiederalnych vybarach. Papiaredni antyrekord partyi — 9% hałasoŭ — byŭ zafiksavany ŭ Bremienie ŭ 1951 hodzie.

U Bierlinie kala 25% hałasoŭ atrymlivaje levaradykalnaja partyja Die Linke («Levaja»), a CHDS, jaki da apošniaha času ŭznačalvaŭ rehijanalnuju kaalicyju, idzie na druhim miescy z 20%. Ale i tut, jak pakazvajuć ekzitpoły, AdH zajmaje treciaje miesca z 16% hałasoŭ.

U vystupleńni adrazu paśla zakryćcia vybarčych učastkaŭ kancler Mierc pryznaŭ, što vybary ŭ Mieklenburhu — Piaredniaj Pamieranii stali novym udaram dla chryścijanskich demakrataŭ. «Niejak padsaładzić vyniki ŭ Mieklenburhu — Piaredniaj Pamieranii my nie možam, heta katastrofa», — skazaŭ jon.

«Viera ŭ instytuty našaj krainy padaje, i jaje aktyŭna padryvajuć radykalnyja partyi sprava i źleva», — kanstatavaŭ hiermanski lidar.

Pavodle słoŭ Mierca, jon niasie za heta adkaznaść. Adnak, adchilajučy ŭzmocnienyja zakliki syści z pasady na fonie niaŭdač CHDS i vielmi nizkich asabistych rejtynhaŭ papularnaści, jon zajaviŭ, što hatovy pravieści krainu praz novyja pieramieny.

Žyć pa-staromu, pavodle jaho słoŭ, nielha. «Hiermanija pavinna stać krainaj novych pačatkaŭ», — zajaviŭ Mierc. Jakija mienavita pieramieny maje na ŭvazie kancler, pakul niezrazumieła.

Manueła Šviezih, staršynia ŭrada Mieklenburha — Piaredniaj Pamieranii ad Sacyjał-demakratyčnaj partyi Hiermanii, ličyć, što AdH nabrała bały, krytykujučy padtrymku Ukrainy i admovu ŭrada Hiermanii ad enierhietyčnaha supracoŭnictva z Rasijaj.

«Pa-pieršaje, u našaj ziamli mnohija ludzi niezadavolenyja padtrymkaj Ukrainy — jak finansavaj, tak i vajennaj. Pa-druhoje, mnohija chacieli b, kab «Paŭnočny patok» znoŭ zapracavaŭ», — skazała jana.

Uličvajučy praciahłuju admovu niamieckich partyj ad supracoŭnictva z AdH, małavierahodna, što vysoki vynik u Mieklenburhu — Piaredniaj Pamieranii daść ultrapravym realnyja mahčymaści dla kiravańnia hetym rehijonam.

Adnak niadzielnyja vybary adbylisia praz dva tydni paśla amal biezumoŭnaj pieramohi AdH i razhromnaj parazy CHDS u ziamli Saksonija-Anchalt i paćviardžajuć tendencyju da histaryčnaha pierałomu ŭ niamieckaj palitycy.

• 0
• 2
• 3
• 4
• 1
• 1
• 1
• 0