Paviedamleńni, što ŭ kabinie piłotaŭ na borcie z Dubaja ŭ Tel-Aviŭ pabilisia rasijanin i ŭkrainiec, akazalisia fejkam
Adzin piłot byŭ hramadzianinam AAE, a druhi piłot — amancam, jakoha padazrajuć u sprobie raźbić samalot, piša Ynet.
Kadry z borta samalota
Pieršapačatkova miedyja sa spasyłkaju na 12‑y izrailski kanał paviedamlali, što ŭ kabinie samalota FlyDubai, jaki rezka straciŭ vyšyniu, pabilisia rasijski i ŭkrainski piłoty. Adnak ciapier paviedamlajecca, što adzin piłot byŭ hramadzianinam AAE, a druhi piłot — amancam, jakoha padazrajuć u sprobie raźbić samalot.
Pavodle vydańnia Ynet, druhi piłot z Amana napaŭ na emirackaha kamandzira pavietranaha sudna i paraniŭ jaho nažom. Śledčyja miarkujuć, što jon moh pasprabavać zachapić kiravańnie i raźbić Boeing 737 MAX 8 sa 174 pasažyrami, siarod jakich byli 27 dziaciej.
Spynić napadnika, jak śćviardžajecca, dapamahli členy ekipaža, schavany supracoŭnik biaśpieki i niekalki pasažyraŭ. Inšyja piłoty, jakija lacieli hetym rejsam jak pasažyry, dapamahli pasadzić samalot.
Adna z pasažyrak raskazała telekanału i24NEWS:
«My pačuli kryki. Kali adčynili kabinu, ubačyli šmat kryvi. Niechta ŭdaryŭ piłota ścizorykam».
Padčas incydentu samalot rezka źniziŭsia prykładna z 10 da 4,3 kiłamietra. Ekipaž pieradaŭ spačatku ahulny sihnał biedstva 7700, a paśla kod 7500, jaki aznačaje niezakonnaje ŭmiašańnie abo zachop samalota.
Bort, jaki lacieŭ z Dubaja ŭ Tel-Aviŭ, raźviarnuŭsia i biaśpiečna pryziamliŭsia ŭ Tabuku ŭ Saudaŭskaj Aravii. U FlyDubai paćvierdzili «incydent padčas palotu», ale pakul nie raskryli jaho padrabiaznaściaŭ. Usie pasažyry zastalisia žyvyja.
Izrailskija siłaviki ciapier razhladajuć zdareńnie jak mahčymy terakt. Kančatkovy matyŭ druhoha piłota pakul nie ŭstanoŭleny: praviarajucca jak ideałahičnaja, tak i psichałahičnaja viersii.
Aficyjnaja viersija nie ahučvałasia.