26 pałos maje chiba što samaja šyrokaja aŭtastrada śvietu. Ale ad zatoraŭ nie ratuje

Kala Chjustana ŭ ZŠA jość aŭtastrada, jakaja miescami dasiahaje 26 pałos u šyryniu. Jaje hadami pašyrali, kab dać rady zatoram, i ŭ niejki momant zdavałasia, što prablemu sapraŭdy vyrašyli. Ale nienadoŭha.

Aŭtastrada Kejci (Katy Freeway) kala Chjustana ŭ štacie Techas (ZŠA). Fota: Getty Images

U ZŠA vielizarnyja šmatpałosnyja aŭtastrady — zvyčajnaja častka piejzažu. Asabliva heta prykmietna vakoł bujnych haradoŭ, dzie ŭ hadziny pik na darohi adnačasova vyjazdžajuć sotni tysiač ludziej. Ale navat na hetym fonie jość učastak, jaki vyłučajecca svaimi pamierami.

Havorka pra aŭtastradu Kejci (Katy Freeway) kala Chjustana ŭ štacie Techas. Heta častka mahistrali Interstate 10 daŭžynioj kala 3860 kiłamietraŭ, jakaja prachodzić praz poŭdzień ZŠA i złučaje zachodniaje ŭźbiarežža krainy z uschodnim.

Na adrezku pamiž Chjustanam i pryharadam Kejci darohu hadami pašyrali, a paśla vialikaj rekanstrukcyi, zavieršanaj u 2008 hodzie, jana miescami stała naličvać 26 pałos. Adnak jość važnaja ahavorka: hetaja ličba taksama ŭklučaje pa čatyry źjezdy ŭ kožnym kirunku.

Jak nahadvaje Bild.de, pašyrać aŭtastradu Kejci pačali nie dziela rekordu. Hałoŭnaj prablemaj byli zatory. Chjustan chutka ros, vakoł jaho pašyralisia pryharady, a tysiačy ludziej štodnia jechali ŭ horad na pracu i viartalisia nazad. U niejki momant isnujučaj prapusknoj zdolnaści prosta pierastała chapać.

Łohika ŭładaŭ była prostaja: kali mašynam ciesna, treba dadać im miesca. Paśla rekanstrukcyi ruch sapraŭdy na niekatory čas staŭ bolš svabodnym, i čynoŭniki raźličvali, što novych pałos chopić navat z ulikam dalejšaha rostu ahłamieracyi.

Ale praź niekalki hadoŭ vyśvietliłasia, što prablema viartajecca. Z 2011 da 2014 hoda transpartnaja nahruzka na Katy Freeway znoŭ istotna vyrasła. Dadatkovyja pałosy nie likvidavali zatory nadoŭha, a prosta dali miesca jašče bolšaj kolkaści mašyn.

Pra padobnyja nastupstvy pašyreńnia aŭtastrad navukoŭcy kazali jašče ŭ 1960‑ch hadach. Pryčyna prostaja. Kali daroha stanovicca šyrejšaj i na joj časova lahčej jechać, joj pačynajuć karystacca bolš ludziej. Chtości pierasadžvajecca na aŭtamabil, chtości vybiraje hety maršrut zamiest inšaha, a chtości pačynaje žyć dalej ad centra, bo daroha na pracu zdajecca bolš zručnaj. U vyniku dadatkovyja pałosy pastupova taksama zapaŭniajucca.

Daśledavańnie amierykanskich haradskich aŭtastrad, apublikavanaje ŭ 2019 hodzie, pakazała, što rost kolkaści pałos u vyniku pryvodzić amal da takoha ž rostu aŭtamabilnaha ruchu. A vyjhryš u chutkaści paśla pašyreńnia darohi ŭ siarednim źnikaje prykładna za piać hadoŭ.

Aŭtary daśledavańnia adznačajuć, što takija vyniki staviać pad sumnieŭ efiektyŭnaść pašyreńnia aŭtamahistralaŭ jak doŭhaterminovaha sposabu baraćby z zatorami: pieravahi ad novaj prapusknoj zdolnaści, źviazanyja z bolšaj chutkaściu ruchu, zvyčajna akazvajucca karotkačasovymi. Historyja aŭtastrady Kejci jakraz dobra pakazvaje, jak heta vyhladaje na praktycy.

Kamientary da artykuła