Pierabiežčyka Vajciachoŭskaha vyklučyli sa śpisu terarystaŭ

Raniej stała viadoma, što biełastockaha aktyvista Anatola Vajciachoŭskaha, jaki viarnuŭsia ŭ Biełaruś praz kamisiju pa viartańni i intervju BT, abviaścili jašče i terarystam. Ale ciapier u hetym śpisie jaho ŭžo niama. 

Anatol Vajciachoŭski

Ciapier Vajciachoŭski nie tolki zastajecca na svabodzie, ale moža i zavieści telefonny numar, i karystacca bankaŭskaj kartkaj. Pryčyny, čamu ŭ dačynieńni da jaho źmianili hnieŭ na miłaść, nieviadomyja. 

Da paślavybarčych pratestaŭ 2020 hoda Anatol Vajciachoŭski ź siamjoj žyŭ u Baranavičach, peŭny čas pracavaŭ na rajonnym vuźle elektrasuviazi. U siaredzinie 1990‑ch staŭ adnym z zasnavalnikaŭ miascovaj haziety «Šah». Heta adna ź pieršych pryvatnych haziet horada i niekali adna z samych papularnych, jaje nakład dasiahaŭ 11 tysiač ekzemplaraŭ. Paźniej jana pierafarmatavałasia ŭ čysta rekłamnuju.

U pačatku 2000‑ch Vajciachoŭski syšoŭ z žurnalistyki, staŭ pradprymalnikam. Jon zajmaŭsia miedycynaj i tavarami dla zdaroŭja. U 2023 hodzie jaho zatrymaŭ HUBAZiK — za toje, što Anatol pakidaŭ u telehramie kamientaryi suprać rasijskaha ŭvarvańnia va Ukrainu i hvałtu siłavikoŭ, ale kali jaho vypuścili, jon apieratyŭna evakujavaŭsia za miažu pry dapamozie «Bajsoła», žyŭ u Biełastoku.

U pačatku 2026 hoda Vajciachoŭski praz kamisiju pa viartańni viarnuŭsia ŭ Biełaruś.

Niahledziačy na toje, što jon źniaŭsia ŭ prapahandysckim filmie BT, jaho sudzili pa čatyroch palityčnych kryminałkach:

• č. 3 art. 361 KK — «zakliki da sankcyj», 
• č. 2 art. 367 KK — «paklop na Łukašenku»,
• č. 2 art. 368 KK — «abraza Łukašenki»,
• č. 1 art. 361‑4 KK — «sadziejničańnie ekstremisckaj dziejnaści».

Minimum, jaki jon moh atrymać pa hetych artykułach, — čatyry hady kałonii. Adnak Vajciachoŭskamu dali chatniuju chimiju.

Kamientary da artykuła