Biełarusaŭ zaprašajuć abdymacca ź nieznajomcami. Cana pytańnia — 65 rubloŭ
U Minsku i Homieli pravodziać sustrečy-abdymki: za 65 rubloŭ biełarusam prapanoŭvajuć ciaham dźviuch z pałovaj hadzin abdymacca ź nieznajomcami i zafinalić usio pavolnym tancam.
Nadoječy arhanizatary anansavali novy nabor u hrupu abdymak i vyklikali haračaje abmierkavańnie siarod biełarusaŭ u sacsietkach.
«Moj strašny son», «Efiekt siekty», «A kali tam apyniecca mańjak?», — z tryvohaj reahavali ludzi, jakija ŭpieršyniu pačuli pra takuju praktyku.
Skrynšot: @obnimi_minsk / Threads
Na spravie pieršyja sustrečy-abdymki, ci cuddle party, prajšli ŭ Minsku jašče try hady tamu. Ideja padobnych viečaryn pachodzić z ZŠA, tam jany byli papularnyja jašče ŭ 80‑ia. U nulavyja ž u Ńju-Jorku ich, naprykład, praktykavali koŭčy pa adnosinach Rejd Michałka i Marsija Bačynski. Paśla jany navat stvaryli svaju navučalnuju prahramu dla siertyfikacyi trenieraŭ pa cuddle party.
U Biełarusi za kalektyŭnyja sieansy abdymak adkaznaja psichołah z Homiela Śviatłana. «Kadł-paci» jana prezientuje jak terapieŭtyčnyja hrupy, jakija dapamahajuć pašyryć koła znajomych tym, chto pracuje dystancyjna, stamiŭsia ad ekranaŭ hadžetaŭ, maje nizkuju samaacenku ci niadaŭna pierajechaŭ u novy horad. Taksama terapieŭtka raić abdymki pad svaim kiraŭnictvam tym, chto niadaŭna pieražyvaŭ traŭmatyčny dośvied, razvod i choča viarnuć davier da čałaviectva.
Rehistracyja na sustreču adbyvajecca praz telehram-bot, dzie novaha ŭdzielnika prosiać paznačyć svoj poł, uzrost i pahadzicca z tak zvanym kodeksam sustrečy, kudy ŭvachodzić abiacańnie nie pić, nie palić minimum jak za paru hadzin da sustrečy, pačyścić zuby, a na miescy — ni ŭ jakim razie nie dakranacca da intymnych zon nieznajomcaŭ. Taksama padčas rehistracyi ŭ bocie vas paprosiać zapisać karotkuju videaprezientacyju.
Da abdymak u hrupie prystupajuć paśla papiaredniaha znajomstva, jakoje ciahniecca pryblizna hadzinu.
Arhanizatary zapeŭnivajuć, što luby hvałt i sproby abmacać u ich vyklučanyja, bo heta prahavorvajecca na starcie.
Fota: @obnimi_minsk / Instagram
«Na našych sustrečach taktylnaść — heta mahčymaść, a nie abaviazak. U adkaz na prapanovu abniacca dziaŭčyna moža skazać «tak», «nie», «nie ciapier». A jašče jana moža sama vybrać, z kim joj chočacca ŭzajemadziejničać. Adšturchnucca ad svajho «ja chaču», a nie ad «chto prapanuje — z tym i budu».
Tak ci inakš, niekatoryja biełarusy ź niedavieram pastavilisia da abiacańniaŭ biaśpieki:
«Mańjaki ŭmiejuć šyfravacca», «A kali niechta budzie chvory i ź virusam?», «Nie razumieju, jak možna dazvolić nieznajomcu kranać siabie ŭsiaho praz hadzinu kantaktu», «U mianie tryvoha ad adnaho apisańnia farmatu, a tut kažuć pra jaho terapieŭtyčnaść».
Ale jość i tyja, chto ŭžo praciahły čas naviedvaje padobny farmat viečaryn.
«Ja adčuła siabie maleńkaj dziaŭčynkaj, jakaja znachodzicca pad abaronaj u mocnych abdymkach, ale dadatkova moža padzialicca kłopatam i ź inšym čałaviekam. U štodzionnym žyćci davodzicca vyrašać šmat pytańniaŭ, dzie treba być i nastojlivaj, i sa stryžniem. Takoha dziavočaha stanu mnie vielmi brakavała», — napisała adna z udzielnic raniejšych spatkańniaŭ.