Što takoje rabatyzavanyja tureli, jakija pavinny vyratavać Kijeŭ ad reaktyŭnych «šachiedaŭ»

Ad atak reaktyŭnych «šachiedaŭ», jakimi rasijskaja armija ŭžo bolš za miesiac źniščaje infrastrukturu Kijeva, stalicu ciapier pavinny abaranić rabatyzavanyja ahniavyja ŭstanoŭki. Hetuju inavacyjnuju technałohiju Ukraina ŭžo vykarystoŭvaje na froncie. Jak jana pracuje, piša Ukrainskaja słužba Bi-bi-si.

Aŭtamatyčnaja turel, jakija staviać u Kijevie. Fota: Ministerstva abarony Ukrainy

Pra pieršy vopyt prymianieńnia turelaŭ u Kijevie paviedamiŭ 5 kastryčnika pres-sakratar Pavietranych sił USU Juryj Ihnat. Dniom raniej pra heta taksama raskazaŭ prezident Ukrainy Uładzimir Zialenski.

Pavodle słoŭ prezidenta, u Kijevie ŭžo pastavili bolš za 12 takich ustanovak, jašče vosiem aŭtamatyčnych bajavych modulaŭ pad kulamioty 50‑ha kalibru staviać u Kijeŭskaj vobłaści.

Jak paviedamiŭ Juryj Ihnat, u stalicy tureli raźmiaščajuć u pieršuju čarhu na mastach. U apošnija dni niekalki rasijskich udaraŭ pa Paŭdniovym i Paŭnočnym mastach Kijeva, jakija złučajuć pravy i levy bierah stalicy, nanieśli paškodžańni i faktyčna spyniali ruch transpartu ŭ horadzie.

Ihnat paviedamiŭ 5 kastryčnika, što z dapamohaj novych ustanovak užo ŭdałosia źbić reaktyŭnyja «Hierani-5».

«Jość užo źbićcio reaktyŭnych «Hieraniaŭ-5», ja byŭ skieptykam, ci heta mahčyma, ale prymianieńnie inavacyjnych technałohij, ŠI vyklučyła čałaviečuju pamyłku, pracujuć techničnyja raźliki, vykarystańnie mašynnaha zroku», — skazaŭ Ihnat.

Pakolki tureli dziejničajuć aŭtamatyčna, vajskoŭcy nahadvajuć, što padčas pavietranych tryvoh znachodzicca kala voknaŭ nie varta.

Asnoŭnaja prablema z reaktyŭnymi bieśpiłotnikami — ich chutkaść, jakaja ŭ niekalki razoŭ pieravyšaje chutkaść zvyčajnych «šachiedaŭ». Zialenski zajaŭlaŭ, što zvyčajnyja «šachiedy» ŭkrainskaja PAA zaraz pierachoplivaje prykładna ŭ 85—92% vypadkaŭ, tady jak reaktyŭnyja drony — tolki pałovu ci trochi bolš.

To jak dapamohuć tureli?

Jak heta pracuje

Turel, ad francuzskaha «maleńkaja vieža», — heta ŭstanoŭka dla macavańnia kulamiota ci harmaty roznych kalibraŭ. Jana pavaročvajecca ŭ haryzantalnaj i viertykalnaj płoskaściach i dazvalaje navodzić zbroju na cel.

Abstalavanyja štučnym intelektam tureli samastojna vyjaŭlajuć i praličvajuć trajektoryju varožaha bieśpiłotnika. Usia miechaničnaja častka — pavarot ustanoŭki, naviadzieńnie na cel — adbyvajecca aŭtamatyčna. Apierataru zastajecca tolki paćvierdzić paražeńnie adnym naciskańniem knopki.

Heta inavacyjnaje rašeńnie źjaviłasia na ŭzbrajeńni ŭkrainskich sił jašče ŭ mai hetaha hoda. ŠI-turel raspracavali ŭkrainskija vytvorcy razam z kłastaram abaronnych inavacyj Brave1 i vajskoŭcami. Pieršymi turel vyprabavali ŭ bai vajskoŭcy padraździaleńnia K-2, jakija aktyŭna vykarystoŭvajuć bieśpiłotniki i novyja vajskovyja technałohii.

Jak paviedamlała tady Minabarony Ukrainy, hetuju technałohiju pačali vykarystoŭvać dla abarony vajskoŭcaŭ ad dronaŭ na pryfrantavych terytoryjach i linii bajavoha sutyknieńnia. Tureli pierš za ŭsio dazvolili abaranicca ad niepaduładnych REB dronaŭ na optavałaknie. Ale jany taksama efiektyŭnyja dla chutkich i manieŭranych celaŭ.

Aŭtamatyčnaje pryniaćcie rašeńniaŭ i chutki pralik paramietraŭ dazvalajuć apieratyŭna reahavać i adkryvać ahoń u napramku pavietranych celaŭ, tłumačyła profilnaje vydańnie «Militarnij».

Va Ukrainie vykarystoŭvajuć roznyja vidy aŭtamatyzavanych turelaŭ, jak, naprykład, Sky Sentinel ci jašče adna ŭkrainskaja raspracoŭka «Chižak» («Drapiežnik»). «Chižak» moža pavaročvacca na 360 hradusaŭ i padymać zbroju ŭharu na 75 hradusaŭ.

Radyus dziejańnia rabatyzavanych turelaŭ źjaŭlajecca nievialikim, bo asnoŭnym srodkam paražeńnia zastajecca kulamiot. Tak, turel «Chižak» padčas vyprabavańniaŭ paražała FPV-dron na adlehłaści da 220 mietraŭ, a raspaznavała jaho na adlehłaści da 250 mietraŭ.

Jaki mienavita typ turelaŭ zaraz staviać u Kijevie, nie paviedamlajecca. Ułady zaklikajuć žycharoŭ nie publikavać fota i videa zienitnych ustanovak, a taksama nastupstvy abstrełaŭ. Bo praciŭnik takim čynam adsočvaje i analizuje ich, kab karektavać paŭtornyja ŭdary.

Jak nahadała znoŭ meryja Kijeva, zabaroniena zdymać i publikavać:

• vajskovyja abjekty i pieramiaščeńnie techniki;
• nastupstvy rakietnych abo dronavych udaraŭ;
• pracu supraćpavietranaj abarony;
• pieramiaščeńnie ci miescy raźmiaščeńnia padraździaleńniaŭ USU i inšych vajskovych farmavańniaŭ.

Kamientary da artykuła