Kolki biełarusaŭ vučycca ŭ amierykanskich univiersitetach?

U 2024/25 navučalnym hodzie ŭ kaledžach i ŭniviersitetach ZŠA vučylisia 1 177 766 zamiežnych studentaŭ. Heta rekordny pakazčyk, jaki składaje kala 6% ad ahulnaj kolkaści studentaŭ amierykanskich vyšejšych navučalnych ustanoŭ. Za hod kolkaść zamiežnych studentaŭ vyrasła prykładna na 5%, piša Thinktanks.pro.

Zdymak ilustracyjny. Fota: vecteezy.com

Pavodle daśledavańnia Institute of International Education, u amierykanskich univiersitetach vučylisia 411 studentaŭ ź Biełarusi. U paraŭnańni z papiarednim navučalnym hodam ich kolkaść pavialičyłasia na 5,7%.

Biełaruś pa hetym pakazčyku apiaredžvaje Litvu, adkul u amierykanskich VNU vučylisia 343 studenty, i Łatviju — 271. Pry hetym biełarusaŭ značna mienš, čym studentaŭ z Ukrainy — 2346, Polščy — 1809 i Rasii — 4948.

Najbolšuju kolkaść zamiežnych studentaŭ u ZŠA daje Indyja — 363 019 čałaviek, abo 30,8% ad usich zamiežnikaŭ. Za hod ich kolkaść pavialičyłasia na 9,5%. Na druhim miescy znachodzicca Kitaj — 265 919 studentaŭ, abo 22,6%, ale kolkaść kitajskich studentaŭ za hod skaraciłasia na 4,1%. Dalej iduć Paŭdniovaja Kareja — 42 293 studenty, Kanada — 29 903 i Vjetnam — 25 584.

U ahulnuju statystyku zamiežnych studentaŭ uvachodziać nie tolki ludzi, jakija niepasredna vučacca va ŭniviersitetach i kaledžach. U jaje taksama ŭklučajuć vypusknikoŭ, jakija paśla zakančeńnia navučańnia časova pracujuć u ZŠA ŭ ramkach prahramy Optional Practical Training (OPT). U statystycy Open Doors ich pa-raniejšamu ličać zamiežnymi studentami, pakolki OPT źjaŭlajecca častkaj adukacyjnaj prahramy dla zamiežnikaŭ.

U 2024/25 navučalnym hodzie kolkaść udzielnikaŭ OPT pavialičyłasia na 21% i dasiahnuła 294 253 čałaviek. Adnačasova kolkaść novych zamiežnych studentaŭ, jakija ŭpieršyniu pastupili ŭ amierykanskija VNU, skaraciłasia na 7% — da 277 118 čałaviek.

Kamientary da artykuła