Vy nie čuli pra jaho, a jon vyznačaje kirunki novaj, časta niečakanaj zamiežnaj palityki ZŠA

Endzi Bejkier doŭhi čas zastavaŭsia amal niezaŭvažnaj fihuraj u amierykanskaj palitycy. Šyrokaja publika ŭpieršyniu pačuła jaho imia vypadkova — u sakaviku, kali vice-prezident Džej Dzi Vens nazvaŭ jaho svajoj klučavoj asobaj u administracyi padčas skandalnaj uciečki z hrupavoha čata, pryśviečanaha ŭdaram pa chusitach u Jemienie.

Adnak, jak piša vydańnie Politico, žurnalisty jakoha parazmaŭlali z tuzinam čałaviek, u tym liku z supracoŭnikami Biełaha doma, vysokapastaŭlenymi jeŭrapiejskimi čynoŭnikami i ekśpiertami analityčnych centraŭ, hetaja zhadka tolki padkreśliła paradoks: niahledziačy na amal poŭnuju adsutnaść publičnaści, Bejkier staŭ adnoj z centralnych postaciaŭ u farmiravańni zamiežnaj palityki ZŠA.

Mienavita praź jaho prachodzić značnaja častka idej, jakija vyznačajuć jak pazicyju vice-prezidenta, tak i šerah najbolš rezanansnych rašeńniaŭ administracyi — u tym liku žorstki i ŭsio bolš kanfrantacyjny kurs u dačynieńni da jeŭrapiejskich sajuźnikaŭ.

Bejkier niepasredna ŭdzielničaŭ u padrychtoŭcy hučnaj pramovy Vensa na Miunchienskaj kanfierencyi pa biaśpiecy ŭ lutym 2025 hoda. U hetym vystupie jeŭrapiejskich lidaraŭ rezka krytykavali. Hałoŭnaja dumka zaklučałasia ŭ tym, što Jeŭropa sama adstupaje ad bazavych kaštoŭnaściaŭ zachodniaha śvietu, i mienavita heta, a nie vonkavyja pahrozy, padryvaje transatłantyčny sajuz.

Tyja ž tezisy prasočvajucca i ŭ novaj Stratehii nacyjanalnaj biaśpieki ZŠA, u padrychtoŭcy jakoj Bejkier taksama adyhraŭ značnuju rolu. U dakumiencie padkreślivajecca, što asłableńnie «cyvilizacyjnaj upeŭnienaści» Jeŭropy i jaje zachodniaj identyčnaści źjaŭlajecca klučavym vyklikam biaśpiecy. Adnačasova tam vitajecca rost «patryjatyčnych» nacyjanalistyčnych sił na kantyniencie i krytykujecca łohika «bieśpierapynnaha pašyreńnia» NATA.

Ciapierašniaja amierykanskaja administracyja vystupaje suprać dalejšaha pašyreńnia NATA.

Taki padychod źviazany ź ideałahičnaj pazicyjaj, jakuju sam Bejkier nazyvaje «realizmam», a jaho apanienty — izalacyjanizmam novaha typu. Jon naležyć da taho kryła respublikancaŭ, jakoje skieptyčna stavicca da zamiežnych vajennych interviencyj i ličyć, što ZŠA pavinny dziejničać, zychodziačy vyklučna ź intaresaŭ ułasnaj biaśpieki ci ŭzbahačeńnia, a nie z abstraktnych ideałaŭ svabody i demakratyi.

U hetaj łohicy lubyja aljansy i mižnarodnyja abaviazacielstvy pavinny pierahladacca, kali jany nie prynosiać pramoj i vidavočnaj vyhody Amierycy. Jeŭrapiejskija dypłamaty ŭsio čaściej usprymajuć hety kurs jak doŭhaterminovy zruch, a nie jak časovuju asablivaść administracyi Trampa.

Pavialičyć

Chłopiec z rabočaha rajona

Bijahrafija Bejkiera šmat u čym tłumačyć jahonyja pohlady. Jon vyras u rabočaj siamji ŭ rajonie Nort-Bej u San-Francyska — praletarskim rajonie, dzie byŭ tradycyjny mocny rabočy ruch. Atrymaŭšy stupień bakałaŭra historyi ŭ Kalifarnijskim univiersitecie ŭ Bierkli, Bejkier praciahnuŭ navučańnie ŭ Oksfardzie, dzie ŭ 2007 hodzie atrymaŭ navukovuju stupień i piać hadoŭ pracavaŭ vykładčykam.

Jaho dysiertacyja, jakaja paźniej vyjšła knihaj, była pryśviečanaja stvareńniu mižnarodnaha paradku paśla Druhoj suśvietnaj vajny. U joj aŭtar padkreślivaŭ, što stabilnaść hetaj sistemy trymałasia na ahulnych ujaŭleńniach pra suvierenitet i prymianieńnie siły — i mienavita strata hetych pryncypaŭ, na jaho dumku, siońnia razburaje zachodniuju jednaść.

U 2010 hodzie Bejkier pierajšoŭ na pracy ŭ Dziarždepartamient i pačaŭ karjeru kadravaha dypłamata. Za 13 hadoŭ słužby jon prajšoŭ praz kamandziroŭki ŭ Afhanistan i pracu ŭ štab-kvatery NATA ŭ Brusieli. Mienavita hety dośvied sfarmavaŭ u im hłyboki skiepsis adnosna amierykanskaj zamiežnaj palityki. Jon pryjšoŭ da vysnovy, što jana słužyć intaresam elit i nie prynosić karyści zvyčajnym hramadzianam, asabliva pradstaŭnikam rabočaha kłasa, ź jakoha jon sam pachodzić.

Klučavy daradca ŭ administracyi Trampa

U 2023 hodzie Bejkier pakinuŭ dziaržsłužbu i pačaŭ šukać palityčnaha sajuźnika, jaki padzialaŭ by jaho bačańnie. Takim čałaviekam staŭ Džej Dzi Vens. Ich abjadnała nie tolki padobnaje pachodžańnie, ale i pierakanańnie, što amierykanskaja moc tolki marnujecca za miažoj.

Paśla pieramohi Trampa Bejkier atrymaŭ mahčymaść realizavać svaje idei na praktycy. Asabliva heta prajaviłasia ŭ padychodzie da vajny va Ukrainie.

Bejkier, jaki svabodna vałodaje ruskaj movaj (a taksama bałharskaj i piersidskaj), udzielničaŭ u raspracoŭcy asnoŭnych paramietraŭ novaha kursu amierykanskaj administracyi, uklučajučy ekanamičnyja aśpiekty, takija jak pahadnieńnie ab zdabyčy karysnych vykapniaŭ va Ukrainie.

Pa słovach krynic, jaho pazicyja nie źjaŭlajecca antyŭkrainskaj — chutčej, jon imkniecca nie nahružać ZŠA zabaviazańniami, jakija nie padajucca jamu žyćciova važnymi. Adnačasova taki padychod vyklikaje zaniepakojenaść u Jeŭropie: jeŭrapiejcy miarkujuć, što Bejkier pieraaceńvaje siłu Rasii i niedaaceńvaje jaje słabaści.

Pra ŭpłyŭ Bejkiera śviedčać kankretnyja fakty: jon prysutničaŭ u Situacyjnym pakoi ŭ červieni 2025 hoda, kali Tramp naziraŭ za bambavańniem iranskich jadziernych abjektaŭ. Jon taksama ŭdzielničaŭ u płanavańni kampanii suprać chusitaŭ i reakcyi ZŠA na napružanaść pamiž Indyjaj i Pakistanam.

Viasnoj, padčas maštabnych pierastanovak u Radzie nacyjanalnaj biaśpieki (RNB), Bejkier zaniaŭ pasadu namieśnika pamočnika prezidenta ZŠA pa nacyjanalnaj biaśpiecy. Tam jon ščylna pracuje ź dziaržaŭnym sakratarom Marka Rubia, jaki adnačasova ŭznačalvaje RNB, i inšym namieśnikam, Robiertam Hebryełam-małodšym. Rubia nazvaŭ Bejkiera «kaštoŭnym členam kamandy», čyj uniosak adyhraŭ klučavuju rolu ŭ prasoŭvańni paradku dnia «Amieryka pierš za ŭsio».

«Idei, jakija znachodziać vodhuk»

Ludzi, znajomyja z Bejkieram, adznačajuć, što jon chutčej nahadvaje navukoŭca, čym praktyčnaha palityka. «Jon nie palityčnaja žyvioła. Jon vielmi aściarožny — jon strateh», — kaža adna z krynic.

Niahledziačy na heta, upłyŭ Bejkiera praciahvaje raści. Jon uvachodzić u hrupu myślaroŭ novaj chvali ŭ Respublikanskaj partyi razam z takimi fihurami, jak namieśnik ministra abarony Ełbrydž Kołbi, jakija vystupajuć za pieraaryjentacyju amierykanskaj palityki — u tym liku na supraćstajańnie Kitaju i skaračeńnie prysutnaści ŭ Jeŭropie. Unutry administracyi hetaje kryło kankuruje z bolš tradycyjnymi «jastrabami», ale sama hetaja baraćba idej užo śviedčyć pra hłybokija źmieny ŭ amierykanskim palityčnym dyskursie.

Z ulikam taho, što Vens razhladajecca jak adzin z hałoŭnych pretendentaŭ na pasadu prezidenta ŭ 2028 hodzie, rola Bejkiera, chutčej za ŭsio, budzie tolki ŭzrastać. Mnohija ŭ Vašynhtonie ličać, što jon zastaniecca ŭpłyvovaj fihuraj niezaležna ad taho, chto ŭznačalić Respublikanskuju partyju ŭ budučyni. Tamu dla razumieńnia taho, jakoj moža stać zamiežnaja palityka ZŠA ŭ najbližejšyja hady, varta ŭvažliva sačyć mienavita za im.

• 4
• 1
• 2
• 2
• 0
• 0
• 3
• 1