ES vyklučyć biznesoŭcaŭ Huceryjeva i Šaŭcova ź biełaruskaha sankcyjnaha śpisu
Pasły krain ES 7 kastryčnika majuć uzhadnić vyklučeńnie z «biełaruskaha» sankcyjnaha śpisu rasijskaha biznesoŭca Michaiła Huceryjeva i biełaruskaha pradprymalnika Viktara Šaŭcova.
Michaił Huceryjeŭ. Fota: Homielski abłvykankam
Pra padrychtoŭku rašeńnia paviedamlaje brusielski karespandent Radyjo Svaboda Rykard Juźviak sa spasyłkaj na dypłamatyčnyja krynicy.
Krynicy Radyjo Svaboda źviazvajuć hety krok ź pieramohami biźniesoŭcaŭ u sudach ES. Pavodle ich, jurydyčnyja padstavy dla zachavańnia hetych sankcyj u ES ličać słabymi.
Pry hetym vyklučeńnie ź biełaruskaha śpisu nie budzie aznačać poŭnaha źniaćcia sankcyj ES z Huceryjeva. 23 lipienia 2026 hoda jaho ŭklučyli ŭ asobny śpis, źviazany z rasijskaj ahresijaj suprać Ukrainy. Rada ES abhruntavała heta jahonaj dziejnaściu ŭ siektarach rasijskaj ekanomiki, jakija prynosiać značnyja dachody ŭradu Rasii, a taksama padtrymkaj hetaha ŭradu praź inviestycyjnyja prajekty.
Šaŭcoŭ u inšych śpisach nie fihuruje.
Huceryjeŭ trapiŭ pad sankcyi ES 21 červienia 2021 hoda. Rada ES nazyvała jaho daŭnim siabram Alaksandra Łukašenki, jaki finansava padtrymlivaŭ jahony režym i atrymlivaŭ ad hetaha vyhadu.
Siarod padstaŭ zhadvalisia inviestycyi ŭ Biełaruś, u tym liku budaŭnictva kampanijaj «Słavkalij» Niežynskaha horna-abahačalnaha kambinatu, a taksama prysutnaść Huceryjeva na inaŭhuracyi Łukašenki 23 vieraśnia 2020 hoda.
Viktara Šaŭcova, byłoha staršyniu naziralnaj rady banka «Rašeńnie», raniej viadomaha jak «Infabank» i «Trastbank», uklučyli ŭ sankcyjny śpis 5 žniŭnia 2024 hoda, kali było apublikavana adpaviednaje rašeńnie Rady ES ad 26 lipienia.
Rada ES źviazvała jaho z vytvorčaściu achoŭnych hałahram u Biełarusi praz kampanii «Technachimtrejd» i «Hałahrafičnaja industryja». Pavodle tahačasnaha abhruntavańnia sankcyj, jon atrymlivaŭ vyhadu ad manapolii, štučna stvoranaj dziaržavaj.