Ozon adkryŭ jašče dva łahistyčnyja centry ŭ Biełarusi
Rasijski markietpłejs Ozon u kastryčniku 2026 hoda adkryŭ u Biełarusi dva novyja łahistyčnyja centry ahulnaj płoščaj 38,1 tysiačy kvadratnych mietraŭ. Pra heta paviedamiła ahienctva nieruchomaści Result Estate, piša Primepress.by.
Zdymak ilustracyjny
Novy łahistyčny centr Ozon u Bałbasavie Aršanskaha rajona zajmaje 26 tysiač kvadratnych mietraŭ. Jon užo pačaŭ pracu: z 5 kastryčnika prymaje pastaŭki, a z 12 kastryčnika płanuje pačać adhružać zakazy.
Druhi centr płoščaj 12,1 tysiačy kvadratnych mietraŭ raźmieščany ŭ vytvorča-składskim kompleksie ŭ Minsku na vulicy Hareckaha. Z 8 kastryčnika jon pačaŭ absłuhoŭvać łahistyčnyja płyni markietpłejsa.
Paśla adkryćcia hetych dvuch abjektaŭ ahulnyja łahistyčnyja mahutnaści Ozon u Biełarusi vyraśli bolš čym udvaja — prykładna da 65 tysiač kvadratnych mietraŭ.
Akramia novych centraŭ, infrastruktura Ozon u Biełarusi ŭklučaje chab na arandavanych płoščach transpartna-łahistyčnaha kompleksu «Karaloŭ Stan» pad Minskam, a taksama sartavalnyja centry ŭ Oršy, Hrodnie i Baranavičach.
U Result Estate adznačyli, što pašyreńnie Ozon śviedčyć pra rost popytu na sučasnyja składskija pamiaškańni ŭ Biełarusi. Na dumku ahienctva, dla rynku kamiercyjnaj nieruchomaści heta pakazčyk dalejšaha raźvićcia łahistyčnaj infrastruktury i pavieličeńnia patreby ŭ jakasnych składskich abjektach.
Ozon — adna z bujnych šmatkateharyjnych płatformaŭ elektronnaj kamiercyi i markietpłejsaŭ u Rasii. Kampanija była zasnavanaja ŭ 1998 hodzie. U apošnija miesiacy jaje składy ŭ Rasii, paralelna sa składami hałoŭnaha kankurenta Wildberries, rehularna traplajuć pad udary ŭkrainskich bieśpiłotnikaŭ.
Čytajcie taksama:
Ozon zadumaŭ stvaryć bujny łahistyčny kompleks u Oršy
Ukrainskija drony ŭdaryli pa «Azonie» ŭ Biełharadzie
U Rastoŭskaj vobłaści atakavany skład Ozon. Paciarpieli siem čałaviek