U Francyi znajšli dźvie raniej skradzienyja karciny Renuara
U Francyi znajšli dźvie karciny viadomaha mastaka Pjera Ahiusta Renuara, vykradzienyja miesiac tamu z muzieja ŭ horadzie Kań-siur-Mier na poŭdni krainy. Pra heta 9 kastryčnika paviedamiŭ mer horada Bryjan Mason, piša Deutsche Welle.
Viła Renuara ŭ Kań-siur-Mier. Fota: Wikimedia Commons
Bryjan Mason nazvaŭ znojdzienyja pałotny nie prosta tvorami mastactva, a častkaj historyi i kulturnaj spadčyny horada. Pa słovach mera, navina pra ich vyjaŭleńnie pryniesła vialikuju palohku. Mason nie raskryŭ, dzie mienavita znajšli karciny, ale vysoka acaniŭ pracu śledčych.
Za dva dni da hetaha stała viadoma pra zatrymańnie šaści padazravanych u rabavańni muzieja.
Złačynstva adbyłosia rana ranicaj 8 vieraśnia. Dvoje nieviadomych pranikli ŭ muziej Renuara ŭ Kań-siur-Mier, ale, zaŭvažyŭšy, što trapili na kamiery videanazirańnia, vyrašyli ŭciakać. Pa darozie jany kinuli ŭ sadzie dva z čatyroch vykradzienych pałotnaŭ — «Partret madam Stefan Pišon» i «Koka čytaje», na jakim namalavany małodšy syn mastaka Kłod Renuar.
Złamyśniki zdoleli vynieści dźvie inšyja karciny — «Madam Kałona Ramana» i «Maładaja žančyna kala studni». Ich ahulny košt aceńvajecca ŭ vosiem miljonaŭ jeŭra. Rasśledavańnie pravodzili ŭ tajamnicy, kab vyjści na śled mahčymych zakazčykaŭ kradziažu.
Muziej Renuara adkryŭsia ŭ 1960 hodzie na vile, dzie adzin ź viadučych pradstaŭnikoŭ impresijanizmu pravioŭ apošnija hady žyćcia. U jaho kalekcyi jość taksama raboty inšych francuzskich mastakoŭ, u tym liku Arystyda Majola, Pjera Banara i Raula Dziufi.
Čytajcie taksama:
Ź viły Renuara ŭ Francyi skrali karcin na 9 miljonaŭ jeŭra. Chto arhanizuje hetyja rabavańni i jak
U Francyi z muzieja skrali 150‑kiłahramovuju vokładku raboty Salvadora Dali
Rabaŭniki siarod biełaha dnia vykrali z muzieja ŭ Vienie kalje z 600 dyjamientami