Irłandyja prapanuje skaracić biudžet Jeŭrasajuza na 8%. Inšyja jašče bolš radykalnyja

Irłandyja prapanavała skaracić biudžet Jeŭrasajuza na 2028—2034 hady prykładna na 140 miljardaŭ jeŭra, abo na 8% u paraŭnańni z prajektam Jeŭrakamisii. Adnak Hiermanija i inšyja bujnyja krainy-donary patrabujuć jašče bolš istotnaha skaračeńnia vydatkaŭ, piša Deutsche Welle.

Svoj varyjant biudžetu Irłandyja, jakaja ciapier staršyniuje ŭ ES, pradstaviła ŭ subotu, 10 kastryčnika.

Prapanujecca skaracić mižnarodnuju dapamohu na 17%, administracyjnyja vydatki — na 12%, a finansavańnie novaha fondu pavyšeńnia kankurentazdolnaści — prykładna na 13%. Vydatki na sielskuju haspadarku i fondy rehijanalnaha raźvićcia mohuć być źmienšanyja na 3%.

Irłandski płan taksama praduhledžvaje značnaje skaračeńnie finansavańnia navukovych daśledavańniaŭ, abarony, źniešniaj palityki i palityki raźvićcia — śfier, na jakija Jeŭrakamisija pieršapačatkova płanavała vydać bolš srodkaŭ. Pry hetym tradycyjna bujnyja artykuły biudžetnych vydatkaŭ, źviazanyja ź sielskaj haspadarkaj i palitykaj zhurtavańnia, amal nie zakranajucca.

Irłandskuju prapanovu abmiarkujuć na samicie ES na nastupnym tydni.

Pamiž 27 krainami Jeŭrasajuza isnujuć istotnyja supiarečnaści nakont sumy budučaha biudžetu. Hiermanija, Niderłandy, Šviecyja i Aŭstryja, jakija naležać da bujnych donaraŭ ES, vystupajuć za značnaje skaračeńnie vydatkaŭ u paraŭnańni z płanam Jeŭrakamisii.

U toj ža čas Francyja, Ispanija i Polšča nastojvajuć na bolšym biudžecie i kateharyčna vystupajuć suprać skaračeńnia subsidyj dla sielskaj haspadarki.

U ES raźličvajuć dasiahnuć pahadnieńnia da kanca hoda. Na pieramovy ŭpłyvajuć i palityčnyja abstaviny: nastupnaj viasnoj u Francyi pavinny prajści prezidenckija vybary, a ŭ Ispanii na listapad hetaha hoda pryznačanyja daterminovyja parłamienckija vybary. Pavodle ahienctva AFP, ispanskaja vybarčaja kampanija moža jašče bolš uskładnić dasiahnieńnie damoŭlenaści.

Adzin z dypłamataŭ ES u razmovie z ahienctvam dpa vykazaŭ rasčaravańnie irłandskim prajektam. Na jaho dumku, prapanova nie moža stać navat addalenaj asnovaj dla pahadnieńnia, bo praduhledžany ŭ joj rost vydatkaŭ zastajecca niepasilnym dla biudžetu. Dypłamat taksama zajaviŭ, što płan addaje pieravahu palityčnym zadačam XX stahodździa zamiest padrychtoŭki Jeŭrasajuza da vyklikaŭ XXI stahodździa. Jon zaklikaŭ da bolš realistyčnaha padychodu da finansavańnia.

Biudžet Jeŭrasajuza farmujecca pieravažna za košt unioskaŭ dziaržaŭ-členaŭ, raźličanych u zaležnaści ad ich vałavaha nacyjanalnaha dachodu. Najbolšy ŭniosak robić Hiermanija, ekanomika jakoj značna pieraŭzychodzić ekanomiki astatnich krain ES.

Kamientary da artykuła