NATA: Rasija tolki za vierasień straciła bolš za 50 tysiač vajskoŭcaŭ

U vieraśni 2026 hoda rasijskaje vojska straciła bolš za 50 tysiač vajskoŭcaŭ zabitymi i paranienymi, ź ich da 28 tysiač zahinuli. Pra heta paviedamlaje vydańnie Bloomberg sa spasyłkaj na vysokapastaŭlenaha pradstaŭnika NATA, jaki pažadaŭ zastacca ananimnym. Pavodle jaho acenki, vierasień staŭ dla rasijskich vojskaŭ samym ciažkim miesiacam sioleta pavodle kolkaści strat.

Zdymak ilustracyjny. Fota: nebo-pamyatniki.ru

Pry hetym straty ŭkrainskaha vojska za toj ža pieryjad, pavodle acenki pradstaŭnika aljansu, skłali kala 5 tysiač čałaviek zabitymi i paranienymi. Takim čynam, rasijskija straty mahli prykładna ŭ dziesiać razoŭ pieravysić ukrainskija.

Acenki NATA krychu adroźnivajucca ad źviestak Hienieralnaha štaba Uzbrojenych sił Ukrainy, jaki paviedamiŭ pra 46 230 rasijskich vajskoŭcaŭ, stračanych za vierasień, nie ŭdakładniŭšy kolkaść zahinułych. Pavodle padlikaŭ ukrainskaha boku, štomiesiačnyja straty rasijskaha vojska vyraśli amal na 46%: z 31 710 čałaviek u studzieni da 46 230 u vieraśni.

Usiaho z pačatku poŭnamaštabnaha ŭvarvańnia va Ukrainu ŭ lutym 2022 hoda Rasija, pavodle acenak ukrainskaha boku, straciła kala 1,55 miljona vajskoŭcaŭ. U hetuju ličbu ŭvachodziać zabityja, paranienyja, źnikłyja bieź viestak i trapiŭšyja ŭ pałon. Niezaležna paćvierdzić hetyja źviestki mahčymaści ciapier niama.

Kamientary da artykuła