Inžynier OpenAI staviŭ žučki ŭ ofisie kampanii. Jaho zatrymała FBR, ale pakul niajasna, na kaho jon pracavaŭ
U ZŠA zatrymali 35‑hadovaha inžyniera OpenAI — kampanii-lidarki ŭ śfiery štučnaha intelektu. Z padrabiaznaściami znajomić The Wall Street Journal.
Zdymak ilustracyjny. Udzielniki kanfierencyi OpenAI DevDay 2026 u San-Francyska, 29 vieraśnia 2026 hoda. Fota: Jeff Chiu / AP
Hramadzianin Saudaŭskaj Aravii Abdułrachman Alfazan pracavaŭ u OpenAI ź lipienia 2025 hoda. Pavodle amierykanskaj prakuratury, jon zacikaviŭsia pierahavorkaj u ofisie kampanii ŭ San-Francyska, jakuju mahli braniravać tolki kiraŭniki i ich pamočniki. Tam pravodzili zakrytyja narady, sustrečy z pradstaŭnikami ŭładaŭ i partniorami, a taksama abmiarkoŭvali kanfidencyjnyja daśledavańni i budučyja pradukty. Sam Alfazan nie mieŭ dazvołu naviedvać hety pakoj. Adnak u vieraśni kamiery nazirańnia zafiksavali jaho pablizu nie mienš za dziesiać razoŭ.
Pavodle śledstva, pierad hetym inžynier vykarystoŭvaŭ unutrany instrumient štučnaha intelektu, kab daviedacca pra raźmiaščeńnie ofisaŭ, pierahavornych pakojaŭ i hrafiki sustreč kiraŭnictva OpenAI.
Źleva — schavanaja za televizaram u ofisie OpenAI hukazapisvalnaja pryłada, zahornutaja ŭ tualetnuju papieru. Sprava — taja ž pryłada bujnym płanam. Fota: materyjały fiederalnaha suda ZŠA
Akramia taho, śledčyja vyjavili, što z akaŭnta čat-bota, źviazanaha z žonkaj padazravanaha, rabilisia zapyty pra stvareńnie pryład dla bieśpierapynnaha aŭdyjazapisu, ich šyfravańnie i dystancyjnaje prasłuchoŭvańnie.
Prykładna 28 vieraśnia, jak miarkuje śledstva, Alfazan pastaviŭ u pieramoŭnym pakoi nievialikuju elektronnuju pryładu ź mikrafonam. Jon zaharnuŭ jaje ŭ tualetnuju papieru i padklučyŭ da USB-porta na zadniaj paneli naściennaha televizara.
Adnak užo 30 vieraśnia supracoŭniki słužby biaśpieki OpenAI znajšli pryładu. Kampanija źviarnułasia ŭ FBR, a ŭ pakoi pastavili kamieru nazirańnia.
5 kastryčnika jana zafiksavała, jak Alfazan zajšoŭ u pamiaškańnie i zazirnuŭ za televizar, dzie raniej stajaŭ mikrafon.
Kadr z kamiery nazirańnia ŭ ofisie OpenAI. Pavodle śledstva, na im Abdułrachman Alfazan zaziraje za televizar, dzie raniej znajšli schavanuju zapisvalnuju pryładu. Fota: materyjały fiederalnaha suda ZŠA
U toj ža dzień u inšym pamiaškańni ofisa jon pakinuŭ biez nahladu sumku. U joj supracoŭniki biaśpieki znajšli jašče adzin žučok. Pavodle śledstva, jon byŭ madyfikavany tak, kab uskładnić dostup da zachavanaj infarmacyi. Samu sumku pieradali ŭ biuro znachodak.
Na nastupny dzień inžynier pryjšoŭ pa sumku. Jon zajaviŭ, što ź jaje źnikli bankaŭskaja kartka, kala 500 dołaraŭ i soncaachoŭnyja akulary. Pry hetym pra zapisvalnuju pryładu ničoha nie spytaŭ.
9 kastryčnika inžyniera zatrymali. Jamu vystavili abvinavačańnie ŭ vykarystańni abo sprobie vykarystańnia pryłady dla niezakonnaha pierachopu vusnych razmoŭ. U vypadku pryznańnia vinavatym jamu pahražaje da piaci hadoŭ źniavoleńnia.
OpenAI zvolniła supracoŭnika i zajaviła, što pakul nie vyjaviła prykmiet niepravamiernaha dostupu da zychodnaha koda, paramietraŭ madelaŭ štučnaha intelektu abo danych klijentaŭ.
Kamu mahli pryznačacca zapisy i ci paśpieŭ Alfazan atrymać niejkuju kanfidencyjnuju infarmacyju, pakul nieviadoma.