«Rašeńnie jak by racyjanalnaje». Paźniak vykazaŭsia adnosna dyzielnaj ździełki Trampa z Pucinym

Vieteran biełaruskaha ruchu Zianon Paźniak napisaŭ u svaim telehram-kanale «niekalki prostych słoŭ dla biełarusaŭ, jakija razumna nazirajuć rečaisnaść». U ich jon vykazaŭ svajo staŭleńnie da niadaŭniaj ździełki prezidenta ZŠA Donalda Trampa z prezidentam Rasii Uładzimiram Pucinym i paškadavaŭ, što «tut nie atrymałasia parazumieńnia z kiraŭnictvam Ukrainy».

Zianon Paźniak. Fota: «Naša Niva»

Na dumku Zianona Paźniaka:

«Levaja nianaviść suprać Prezidenta Trampa zaciahvaje zaŭziataraŭ macniej, čym futbolnaje pieršynstva. Tym bolš što zaŭziatarstva iracyjanalnaje. Ciapier jakraz čarhovaja ŭspyška papulisckaj nianaviści».

Jon całkam padtrymlivaje žadańnie Trampa vyrašyć iranskaje pytańnie i prymusić Iran admovicca ad stvareńnia jadziernaj zbroi. Zianon Paźniak ličyć, što vajna ź Iranam składvajecca na karyść amierykanskaha prezidenta:

«Kali b Iran zavałodaŭ atamnaj zbrojaj, pytańnie jaho adnaasobnaha kantrolu nad [Armuzskim] pralivam było b vyrašana. Fłot ZŠA ciapier kantraluje praliŭ, i vajennyja padziei iduć dastatkava pradumana. Vytrymka i paśladoŭnaść prezidenta Trampa tut taksama zaŭvažnyja».

Ale ŭ toj ža čas Paźniak pryznaje, što nie na karyść administracyi Donalda Trampa składvajecca pytańnie, taksama źviazanaje z hetaj vajnoj: «heta pavyšeńnie cany na naftu, bienzin i asabliva na dyziel (bo źviazana najpierš z handlem, z transpartam, z vytvorčaściu i sielskaj haspadarkaj ZŠA)».

I heta ŭžo maje dačynieńnie da spraŭ našaha rehijona, palityku Trampa adnosna jakoha Zianon Paźniak razhornuta tłumačyć: 

«Patrabavańni ZŠA da Ukrainy (asabista Zialenskaha) — nie bambardavać rasiejskija rafineryi. (Možna, značycca, bambardavać usio, tolki nie naftapierahonnyja zavody, bo heta ŭdaryć pa suśvietnych cenach na paliva, i pierš za ŭsio pa ZŠA).

Faktyčna, patrebna była dvuchbakovaja damova ab praviłach viadzieńnia vajny. Na žal, tut nie atrymałasia parazumieńnia z kiraŭnictvam Ukrainy, i Prezident Tramp, byccam by kab źbić vysokuju ŭnutranuju canu na dyziel pierad pramiežkavymi vybarami, pajšoŭ na časovaje pahadnieńnie ab zakupach miziera rasiejskaha dyzielu.

(Ironija ŭ tym, što rasiejcy sami zakupajuć dyziel, i pahadnieńnie vyhladaje prapahandysckim. Prytym nijakaha realnaha ŭpłyvu na Ukrainu, hetak ža jak i na Amieryku, jano mieć nie budzie, i Tramp toje viedaje).

Tym nie mienš, rašeńnie jak by racyjanalnaje. Nakolki jano paŭpłyvaje na canu paliva, i asabliva na elektaralnyja pavodziny amierykancaŭ, daviedajemsia praź miesiac.

Ale mahčyma, što Prezident Tramp u styli svajoj nie nadta zrazumiełaj dla inšych «burlesknaj» palityki realna sam admovicca ad jaho dy prapanuje inšuju niečakanaść. Ale pakul što suśvietnaja cana na naftu krucicca vakoł stanovišča ŭ Armuzskim pralivie».

Kamientary da artykuła