Charvatyja karystajecca žadańniem Čarnahoryi ŭstupić u Jeŭrasajuz, kab pavyrašać na svaju karyść staryja sprečki

Charvatyja papiaredziła, što niavyrašanyja sprečki z Čarnahoryjaj mohuć pieraškodzić ustupleńniu hetaj krainy ŭ Jeŭrasajuz da 2028 hoda. Zahrab pieradaŭ uradam krain ES dakumient z vaśmiu ŭmovami, jakija ličyć nieabchodnymi dla zaviaršeńnia pieramoŭ ab dałučeńni Čarnahoryi, paviedamlaje Euronews.

Zdymak ilustracyjny. Fota: Filip Filipovic / Getty Images

Čarnahoryja zastajecca adnym z hałoŭnych kandydataŭ na nastupnaje pašyreńnie Jeŭrasajuza i raźličvaje stać jaho 28‑j krainaj užo praz dva hady. Kraina dasiahnuła istotnaha prahresu ŭ pieramovach: z 33‑ch raździełaŭ užo zakryty 21. Na hetym tydni byli zavieršanyja jašče try raździeły — pa statystycy, ekanamičnaj palitycy i zaniataści.

Adnak Charvatyja praciahvaje błakavać prasoŭvańnie pa šerahu inšych napramkaŭ, u tym liku pa transparcie, źniešnich suviaziach, asnoŭnych pravach i ŭnutranych spravach. Pakolki kožnaja dziaržava ES moža ŭpłyvać na praces pašyreńnia, pazicyja Zahraba zastajecca surjoznaj pieraškodaj dla čarnahorskaj jeŭraintehracyi.

Asnoŭnyja roznahałośsi źviazanyja z vojnami 1990‑ch hadoŭ i nastupstvami raspadu Juhasłavii. Adno z najbolš adčuvalnych pytańniaŭ — łahier Moryń u Čarnahoryi, dzie ŭ 1991—1992 hadach utrymlivali charvackich mirnych žycharoŭ i vajennapałonnych. Charvatyja patrabuje kampiensacyi dla prykładna 300 byłych viaźniaŭ, a taksama zachavańnia ŭ adkrytym dostupie miemaryjała na miescy łahiera.

Zahrab taksama nastojvaje na vyśviatleńni losu 14 čałaviek, jakija źnikli bieź viestak padčas vajny za niezaležnaść Charvatyi, i bolš poŭnym rasśledavańni vajennych złačynstvaŭ, u tym liku złačynstvaŭ suprać mirnaha nasielnictva i adkaznaści kamandziraŭ za ich učynki.

Jašče adna prablema — majomasnyja sprečki, jakija ŭźnikli paśla raspadu Juhasłavii. Charvatyja patrabuje ŭrehulavać situacyi, kali charvackija siemji stracili svaju majomaść biez naležnaj kampiensacyi. Akramia taho, jana choča viarnuć sabie vučebny paruśnik «Jadran», jaki paśla raspadu fiederacyi zastaŭsia pad kantrolem Čarnahoryi.

Baki taksama nie ŭrehulavali pytańnie suchaputnaj i marskoj miažy. Charvatyja vystupaje za kančatkovaje vyrašeńnie terytaryjalnych roznahałośsiaŭ u adpaviednaści z vysnovami Arbitražnaj kamisii Kanfierencyi pa Juhasłavii.

Niahledziačy na žorstkuju pazicyju, Charvatyja zajaŭlaje, što padtrymlivaje ŭstupleńnie Čarnahoryi ŭ ES. Adnak charvackija ŭłady padkreślivajuć, što klučavyja dvuchbakovyja sprečki dahetul nie vyrašanyja i tamu zastajucca pieraškodaj dla dalejšaha prasoŭvańnia Čarnahoryi da siabroŭstva ŭ Jeŭrasajuzie.

Kamientary da artykuła