Dla ŭjezdu ŭ Kazachstan biełarusam treba budzie zapytvać propusk za try dni

Kazachstan uviadzie elektronnyja dazvoły na ŭjezd dla hramadzian prykładna 60 krain, u tym liku partnioraŭ pa JEAES — Biełarusi, Rasii, Kyrhyzstana i Armienii. Novy paradak ujezdu urad Kazachstana zaćvierdziŭ 10 kastryčnika 2026 hoda, piša The Moscow Times.

Prapuskny punkt na miažy z Kazachstanam

Z 1 lipienia 2027 hoda inšaziemcam, jakija pryjazdžajuć u Kazachstan bieź vizy, treba budzie padavać zajavu na elektronny dazvoł praź ličbavuju płatformu nie paźniej čym za 72 hadziny da ŭjezdu. Afarmleńnie budzie biaspłatnym. Dazvoł buduć vydavać paśla ŭzhadnieńnia z orhanami nacyjanalnaj biaśpieki. Jon budzie dziejničać 180 dzion i dazvolić na praciahu hetaha času niekalki razoŭ ujazdžać u krainu.

Novyja praviły pačnuć uvodzić paetapna. Z 1 listapada 2026 hoda ich płanujuć prymianiać u aeraporcie Aktau i na čatyroch aŭtamabilnych punktach propusku na miažy z Rasijaj. Z 1 studzienia 2027 hoda dazvoły pačnuć patrabavać u aeraportach Astany i Ałmaty, a z 1 sakavika — na ŭsich punktach propusku praź dziaržaŭnuju miažu.

Da lipienia 2027 hoda adsutnaść elektronnaha dazvołu nie budzie padstavaj dla admovy va ŭjeździe. Paśla hetaj daty jaho najaŭnaść stanie abaviazkovaj.

Raniej, u vieraśni, z paviedamleńnia Ministerstva zamiežnych spraŭ Sierbii vynikała, što elektronnyja dazvoły na ŭjezd u Kazachstan mohuć stać płatnymi, a ŭvieści ich płanavali ŭžo ź listapada 2026 hoda. Adnak urešcie zaćvierdžany ŭradam Kazachstana paradak praduhledžvaje biaspłatnaje afarmleńnie i pastupovaje ŭviadzieńnie novych patrabavańniaŭ.

U minułym hodzie Kazachstan vykazvaŭ niezadavalnieńnie tym, što Rasija abaviazała zamiežnikaŭ, u tym liku hramadzian bieźvizavych krain, zahadzia padavać praz dadatak ruID zajavy na ŭjezd — nie mienš čym za try dni. Kazachstanskija ŭłady tady abiacali adkazać lustranymi mierami.

Kamientary da artykuła