ZŠA prapanavali razmarozić častku aktyvaŭ Rasii dziela pieramovaŭ
Adnak jeŭrapiejskija krainy adchilili prapanovu Biełaha doma.
Prezident Ukrainy Uładzimir Zialenski, śpiecyjalny pasłańnik prezidenta ZŠA Styŭ Uitkaf (u centry) i Džared Kušnier (źleva) padčas sumiesnaj pres-kanfierencyi ŭ Kijevie, 6 vieraśnia 2026 hoda. Fota: AP Photo / Francisco Seco
Administracyja prezidenta ZŠA Donalda Trampa prapanavała źniać abmiežavańni z častki dziaržaŭnych aktyvaŭ Rasii, zamarožanych paśla pačatku poŭnamaštabnaha ŭvarvańnia va Ukrainu, kab pasprabavać adnavić mirnyja pieramovy, jakija zajšli ŭ tupik. Adnak jeŭrapiejskija krainy adchilili prapanovu Biełaha doma. Pra heta piša hazieta Financial Times sa spasyłkaj na krynicy.
Pavodle surazmoŭcaŭ FT, taki płan prapanavali śpiecpradstaŭnik prezidenta ZŠA Styvien Uitkaf i ziać Trampa Džared Kušnier padčas niadaŭniaj sustrečy z ukrainskim bokam i pradstaŭnikami jeŭrapiejskich krain u Majami.
Jon praduhledžvaŭ pieravod častki zamarožanych rasijskich aktyvaŭ u śpiecyjalnuju finansavuju strukturu, jakaja znachodziłasia b pad kantrolem Vašynhtona.
Pradstaŭniki Jeŭropy na sustrečy ŭ Majami vystupili suprać pieradačy kantrolu nad aktyvami ZŠA abo viartańnia Rasii luboj častki zamarožanych srodkaŭ, raskazali krynicy haziety. Pavodle ich słoŭ, prapanova Uitkafa i Kušniera vyklikała zaniepakojenaść siarod ukrainskich čynoŭnikaŭ i jeŭrapiejskich dypłamataŭ nakont sprobaŭ Vašynhtona akazać cisk na Rasiju.
U lutym 2022 hoda zachodnija ŭrady zamarozili rasijskija dziaržaŭnyja aktyvy na 260 młrd jeŭra. Bolšaja častka hetych srodkaŭ znachodzicca ŭ Jeŭrapiejskim sajuzie, nahadvaje Deutsche Welle.
ES pakul nie pieradaŭ hetyja srodki Ukrainie i vykarystoŭvaje atrymanyja ź ich dachody dla finansavaj padtrymki Kijeva. U pryvatnaści, Ukraina atrymała ad krain «Hrupy siami» kredyt na 45 młrd jeŭra, zabiaśpiečany pracentnymi dachodami ad zamarožanych aktyvaŭT.
Lidary krain — členaŭ ES paabiacali vykarystać hetyja aktyvy dla finansavańnia adnaŭleńnia Ukrainy, kali Rasija nie vypłacić reparacyi paśla zakančeńnia vajny.
Jak padkreślili krynicy FT, dla razmarožvańnia rasijskich aktyvaŭ ES spatrebicca taksama adnahałosnaja zhoda ŭsich krain — členaŭ błoka. Heta ŭskładnić prasoŭvańnie i realizacyju inicyjatyvy Uitkafa i Kušniera.