Va Urocłavie projdzie fiestyval biełaruskaj kultury
Z 17 pa 24 kastryčnika va Urocłavie projdzie XIV Fiestyval niezaležnaj biełaruskaj kultury «Žyvica». U prahramie — sustreča z Uładzimiram Niaklajevym, teatr, kino, vystavy i majstar-kłasy dla dziaciej i darosłych.
Arhanizatary zaprašajuć i tych, chto daŭno žyvie va Urocłavie, i biełarusaŭ, jakija znajšli tut biaśpiečny dom paśla represij. Fiestyval dla ich — mahčymaść sustrecca, pačuć biełaruskuju movu i razam stvarać kulturu pa-za Biełaruśsiu.
«My nie tolki ŭspaminajem krainu, ź jakoj pachodzim, ale i stvarajem novyja formy žyćcia i kultury tut, va Urocłavie», — havorycca ŭ anonsie.
Nazva «Žyvica» adsyłaje da žyvicy dreva, jakaja dapamahaje jamu haić paškodžańni. Dla arhanizataraŭ heta vobraz kultury, zdolnaj zachoŭvać pamiać i padtrymlivać žyćcio.
17 kastryčnika a 15‑j hadzinie ŭ Asalineumie na płoščy biskupa Nankiera, 17 adbudziecca sustreča z Uładzimiram Niaklajevym i prezientacyja jaho knih. A 16:30 tam ža ŭručać uznaharodu «Za padtrymku biełaruskaj kultury». Uviečary, a 18-j, u Domek Miedziorytnika na Świętego Mikołaja, 1 adkryjecca vystava malunkaŭ Alesia Papkoviča «Sny palityčnaha viaźnia».
18 kastryčnika a 18‑j hadzinie BYteatr pakaža śpiektakl «Biežancy 1915» režysiora Andreja Novika. Pakaz projdzie ŭ Čornaj zale ŭrocłaŭskaj filii Akademii teatralnaha mastactva.
21 kastryčnika a 17‑j hadzinie ŭ Biuro Jeŭraparłamienta na Widok, 10 pakažuć film Mary Tamkovič «Pad šerym niebam», paśla jakoha adbudziecca dyskusija.
23 kastryčnika a 17‑j tam ža projdzie razmova «Biełaruski šlach da demakratyi» z udziełam ekśpiertaŭ i lidaraŭ biełaruskaj apazicyi.
Dla tych, chto choča pasprabavać niešta zrabić svaimi rukami, 20 kastryčnika zapłanavany majstar-kłas pa tkactvie tradycyjnych biełaruskich pajasoŭ. 24 kastryčnika a 12‑j i 14‑j hadzinie ŭ Przedpokój H13 na Świdnicka, 43—45 dziaciej i padletkaŭ zaprašajuć malavać, vyrazać i rabić adbitki biełaruskich uzoraŭ.
Zavieršycca fiestyval 24 kastryčnika a 17‑j hadzinie ŭ kłubie Proza na Przejście Garncarskie, 2. Tam adbuducca finał polska-biełaruska-ŭkrainskaha paetyčnaha konkursu, paetyčny słem i ŭručeńnie premii imia Adama Mickieviča.
Poŭnaja prahrama tut.