Administratarka «Štaba Anošak» vałodaje biełaruskaj kampanijaj, datyčnaj da pastavak sankcyjnych paŭpravadnikoŭ u vajujučuju Rasiju
Maryna Kosmač pačynała ŭ štabie Śviatłany Cichanoŭskaj, a paśla stała na čale kanała, jaki hadami atakuje biełaruskija demakratyčnyja siły. Jaje muž Aleh Maisiejeŭ aryštavany ŭ Estonii za admyvańnie hrošaj.
Maryna Kosmač. Fota: fejsbuk
Dniami «Naša Niva» raskazała pra Aleha Maisiejeva — byłuju davieranuju asobu Śviatłany Cichanoŭskaj i jaje kiroŭcu padčas vybarčaj kampanii 2020 hoda, jaki ciapier znachodzicca ŭ estonskaj turmie pavodle abvinavačańnia ŭ admyvańni hrošaj.
U hetaj historyi ŭźnikła i imia jaho žonki Maryny Kosmač. Ličbavy śled ukazvaje na jaje datyčnaść da telehram-kanała «Štab Anoška», jaki hadami zajmajecca dyskredytacyjaj biełaruskich demakratyčnych struktur.
Vyśvietliłasia, što Kosmač dahetul zastajecca ŭłaśnicaj biełaruskaj kampanii, jakaja ŭdzielničaje ŭ schiematozach pa abychodzie sankcyj i pastaŭkach u Rasiju abstalavańnia dla vajskovych metaŭ.
Była ŭ štabie, paśla apynułasia ŭ inšym kole
Padčas pieradvybarčych padziej 2020 hoda Maryna Kosmač była źviazanaja z štabam Śviatłany Cichanoŭskaj. Paśla pierajezdu ŭ Litvu jana atrymała status uciakački. Ale z časam Maryna Kosmač i jaje muž apynulisia ŭ kole ludziej, jakija vajujuć užo nie z režymam Łukašenki, a ź jaho praciŭnikami: Ofisam Cichanoŭskaj, fondami salidarnaści i niezaležnymi miedyja.
Na suviaź Maryny Kosmač sa «Štabam Anoška» ŭkazvaje pakinuty joju ličbavy śled. Pad spasyłkaj u telehramie, apublikavanaj ad imia kanała, fejsbuk pakazaŭ jaje profil i aŭtamatyčnuju paznaku: «Maryna padzialiłasia hetym z vami». Heta śviedčyć, što spasyłka była pierasłanaja ŭ kanał ź jaje pryvatnaha akaŭnta.
«Štab Anoška» źjaviŭsia pry kancy 2020 hoda. Aŭtary kanała źlivali ŭnutranyja pierapiski i finansavyja dakumienty demakratyčnych struktur, atakavali Ofis Cichanoŭskaj, fondy BYSOL i BY_Help, niezaležnyja miedyja, a taksama tych pradstaŭnikoŭ demakratyčnaha ruchu, jakich adnačasova plažyła i dziaržaŭnaja prapahanda.
Častka skrynšotaŭ z unutranaj pierapiski była praŭdzivaj — ich źliŭ pacuk. Śviatłanu Hałuzu ŭziali pracavać asabistaj asistentkaj Andreja Stryžaka, tamu jana mieła dostup da jaho pryvatnych anłajn-razmovaŭ. I kali pakryŭdziłasia na pracadaŭcu, narabiła skrynšotaŭ. Tak jany i trapili ŭ internet.
Adzin z «Anošak», Illa Biahun, viarnuŭsia ŭ Biełaruś i staŭ hierojem prapahandysckich siužetaŭ, a ŭrešcie pajechaŭ na front vajavać za Rasiju.
Biahun u dziaržSMI śćviardžaŭ, što dziejnaść «Štaba Anošak» kaardynavała i finansavała Volha Karač, jakaja sama mieciła na rolu lidarki apazicyi.
Čytajcie archiŭny materyjał za 2021 hod: «Treba było prybrać parazitaŭ z akružeńnia Cichanoŭskaj». Biahun zajaviŭ, što Karač finansuje kanał z kampramatam na Stryžaka i Viačorku
«Ludzi svabody»
22 krasavika 2021 hoda ŭ Litvie była zarehistravanaja hramadskaja ŭstanova VšĮ «Laisvės žmonės», što pierakładajecca jak «Ludzi svabody». Jaje zasnavali troje hramadzian Biełarusi, a dyrektarkaj stała Maryna Kosmač.
Jana ŭznačalvała arhanizacyju ad momantu rehistracyi da lutaha 2026 hoda, kali dyrektaram staŭ jaje muž Aleh Maisiejeŭ. Adnak kali ŭ červieni 2026 hoda jaho aryštavali ŭ Estonii, dyrektarkaj «Ludziej svabody» znoŭ stała Maryna Kosmač.
Za 2021—2023 arhanizacyja atrymała kala 120 tysiač jeŭra. A z 2024 hoda finansavaja dziejnaść «Ludziej svabody» faktyčna spyniłasia: u spravazdačach paznačanyja nulavyja dachody i vydatki.
Arhanizacyja zajaviła metami dabračynnuju i sacyjalnuju dapamohu achviaram vojnaŭ i inšych biedstvaŭ, kulturnuju dziejnaść i padtrymku ludziej.
Cikava, što ŭ tłumačalnych zapiskach «Ludziej svabody» zamiest ułasnaha rehistracyjnaha koda 305740299 niekalki hadoŭ zapar stajaŭ kod 305633703. Jon naležyć inšaj arhanizacyi — fondu «Kraina dla žyćcia». Bolš za toje, abiedźvie arhanizacyi byli zarehistravanyja pa adnym adrasie: Kalvaryjskaja vulica (Kalvarijų g.), 125 u Vilni.
Ułaśnica kampanii, jakaja vaziła techniku ŭ Rasiju
Pry hetym u Maryny Kosmač praciahvaje pracavać i biznes u Biełarusi — joj naležyć pradpryjemstva «Tefida», jakoje zajmajecca zapčastkami dla darožna-budaŭničaj techniki i składskimi pasłuhami. Kiruje kampanijaj brat Maryny Kosmač, Alaksandr Šybko.
U 2024 hodzie mižnarodny centr rasśledavańniaŭ OCCRP i Buro Media vyśvietlili, što skład «Tefidy» vykarystoŭvaŭsia ŭ schiemie tak zvanaha falšyvaha tranzitu ŭ abychod sankcyj na karyść vajennaj mašyny Rasii.
Abstalavańnie dla vytvorčaści paŭpravadnikoŭ i elektronnych kampanientaŭ afarmlali na kazachstanskuju kampaniju «KBR-Technałohii». Ale ŭ Kazachstan, na dumku rasśledavalnikaŭ, jano mahło nie dajazdžać: tavar traplaŭ u Biełaruś, a paśla — u Rasiju.
U 2022 hodzie praz «Tefidu» prajšli šeść partyj abstalavańnia na sumu kala $716 tysiač. Z sakavika pa žnivień 2023 hoda kampanija, pavodle mytnych danych rasśledavalnikaŭ, adpraviła ŭ Rasiju abstalavańnia jašče prykładna na piać miljonaŭ dołaraŭ. Častka pastavak pryznačałasia hrupie «OSTIEK» i źviazanym ź joj kampanijam. «OSTIEK» pastaŭlaŭ abstalavańnie rasijskamu Centralnamu navukova-daśledčamu instytutu chimii i miechaniki. Instytut źviazany z vytvorčaściu rasijskaj vajennaj techniki, u tym liku bojeprypasaŭ.
«Naša Niva» źviarnułasia pa kamientar da Maryny Kosmač. Jana paćvierdziła, što zastajecca ŭłaśnicaj «Tefidy» da hetaha času, adnak zapeŭniła, što nie ŭdzielničaje ŭ kiravańni kampanijaj i nie prymaje rašeńniaŭ nakont jaje dziejnaści.
Pavodle Kosmač, dla vychadu ź liku zasnavalnikaŭ joj treba viarnucca ŭ Biełaruś, čaho jana zrabić nie moža. Kampanijaj, jak jana kaža, kiruje jaje brat, ale ciapier jany amal nie kantaktujuć: apošni raz razmaŭlali niekalki miesiacaŭ tamu.
Pra pastaŭki abstalavańnia ŭ Rasiju Maryna Kosmač, pavodle jaje słoŭ, daviedałasia paśla vychadu rasśledavańnia «Biuro». Tady jana źviazałasia z bratam i paprasiła rastłumačyć situacyju. Toj zapeŭniŭ jaje, što «Tefida» ničoha nie pastaŭlała, a tolki akazała pasłuhu časovaha zachoŭvańnia hruzu kazachstanskaj kampanii na składzie.
Kosmač pieradała rasśledavalnikam dakumienty, ź jakich vynikaje, što «Tefida» ŭdzielničała ŭ łahistyčnym łancužku — prymała hruz na zachoŭvańnie, zajmałasia jaho mytnym afarmleńniem i pavinna była nakiravać dalej, — ale nie była pradaŭcom abo vytvorcam abstalavańnia.
«Ja źjaŭlajusia zasnavalnicaj kampanii, ale nijakich kiraŭnickich abo inšych rašeńniaŭ u jaje dziejnaści nie prymaju i navat nie viedaju, ci pracuje jana ciapier», — skazała «Našaj Nivie» Maryna Kosmač.