U Estonii aryštavany Aleh Maisiejeŭ, kažuć jaho znajomyja. Heta były kiroŭca Cichanoŭskaj, jaki z časam staŭ jaje zaciatym krytykam
Jašče ŭ 2020 hodzie Aleh Maisiejeŭ jeździŭ razam sa Śviatłanaj Cichanoŭskaj i byŭ jaje davieranaj asobaj. Paźniej jon abvinavačvaŭ jaje atačeńnie ŭ prysvajeńni demakratyčnaha lidarstva i zbliziŭsia z apanientami Ofisa. Maisiejeŭ udzielničaŭ u efirach z Valeryjem Capkałam i Dźmitryjem Bałkuncom i padtrymlivaŭ koła, blizkaje da telehram-kanała «Štab Anoška», jaki zajmajecca dyskredytacyjaj apazicyjnych dziejačaŭ.
Aleh Maisiejeŭ, pa słovach jaho siabroŭ, znachodzicca ŭ estonskim SIZA. Prakuratura abvinavačvaje jaho ŭ admyvańni bolš jak 861 tysiačy jeŭra praz apieracyi z najaŭnymi i kryptavalutaj. Biełarusu pahražaje da 2 da 10 hadoŭ turmy.
Imia abvinavačanaha estonskaja prakuratura nie raskryvała. Ale, pavodle słovaŭ siabroŭ Maisiejeva, ź jakimi parazmaŭlała «Naša Niva» havorka pra jaho.
Bolš za 861 tysiaču jeŭra za try miesiacy
Biełarusa aryštavali ŭ Estonii 13 červienia 2026 hoda. Ciapier sprava pieradadzienaja ŭ sud.
Jak miarkujecca, Maisiejeŭ uvachodziŭ u hrupu, jakaja abmieńvała najaŭnyja hrošy na kryptavalutu i nazad. Za try miesiacy praź jaho, pavodle abvinavačańnia, prajšło bolš za 861 tysiaču jeŭra.
Klijenty i kurjery nie viedali sapraŭdnych imionaŭ adzin adnaho. Kab paznać patrebnaha čałavieka padčas sustrečy, jany karystalisia svojeasablivym parolem: zahadzia dasyłali ŭ zašyfravanym miesiendžary numar banknoty, jakuju potym pakazvali pry pieradačy hrošaj.
Aleh Maisiejeŭ, jak śćviardžaje prakuratura, nie abmiažoŭvaŭsia rolaj kurjera. Jon damaŭlaŭsia z klijentami pra čas i miesca sustreč, sam prymaŭ i pieradavaŭ najaŭnyja, a taksama nakiroŭvaŭ inšych kurjeraŭ.
Byŭ nie prosta kiroŭcam Cichanoŭskaj
U palityku pradprymalnik Aleh Maisiejeŭ pryjšoŭ u 2020 hodzie. Jon dałučyŭsia da kamandy Śviatłany Cichanoŭskaj, staŭ jaje davieranaj asobaj i padčas kampanii vykonvaŭ abaviazki asabistaha kiroŭcy.
A praz dva hady jon staŭ zaciatym krytykam Śviatłany Cichanoŭskaj i jaje atačeńnia.
U 2022 hodzie Maisiejeŭ źjaviŭsia ŭ strymie Valeryja Capkały razam z palitołaham Dźmitryjem Bałkuncom i śpiavačkaj Anžalikaj Ahurbaš. Padčas efiru Śviatłanu Cichanoŭskuju nazyvali «samazvankaj». Kamandu demakratyčnaj lidarki abvinavačvali ŭ tym, što jana nibyta prysvoiła sabie pradstaŭnictva biełarusaŭ i vykarystoŭvaje represii dla atrymańnia zachodnich hrošaj.
Aleh Maisiejeŭ dałučyŭsia da asiarodździa Forumu demakratyčnych sił, stvoranaha Valeryjem Capkałam, Dźmitryjem Bałkuncom i Volhaj Karač. Arhanizatary nazyvali Forum adkrytaj placoŭkaj dla dyjałohu. Na praktycy jon staŭ miescam zboru častki palitykaŭ i aktyvistaŭ, jakija sprabavali adabrać u Cichanoŭskaj status lidarki.
Zarablaŭ na budoŭli
U Litvie Maisiejeŭ atrymaŭ palityčny prytułak. Prapahanda śmiajałasia, što paśla razychodžańnia z kamandaj Cichanoŭskaj jon byŭ vymušany pracavać u Vilni santechnikam.
Paśla pracavaŭ u budaŭničym biznesie, braŭ abjekty ŭ Vilni i Visahinasie. Aproč taho, Maisiejeŭ źjaŭlajecca zasnavalnikam kampanii pa prodažu mebli.
Žonka — udzielnica «Štaba Anoška»
Žonka Maisiejeva — Maryna Kasmač — u 2020 hodzie taksama była źviazanaja z kamandaj abjadnanaha štaba apazicyi, a paśla vyjezdu ź Biełarusi apynułasia ŭ kole ludziej, jakija stvaryli telehram-kanał «Štab Anoška».
Na suviaź sa «Štabam Anoška» ŭkazvaje ličbavy śled, jaki Maryna Kasmač vypadkova pakinuła ŭ kanale: pad apublikavanaj ad imia «Štaba» spasyłkaj na post Siarhieja Cichanoŭskana Telehram pakazaŭ fejsbuk-profil Maryny i paznaku «Maryna padzialiłasia hetym z vami». Takija kartki fejsbuk hienieruje aŭtamatyčna i pryviazvaje da čałavieka, ad imia jakoha była pieradadzienaja spasyłka.
Što da «Štabu Anoška», jon źjaviŭsia ŭ kancy 2020 hoda. Jaho ŭdzielniki publikavali ŭnutranyja pierapiski, finansavyja dakumienty i kampramat na supracoŭnikaŭ Ofisa Cichanoŭskaj, fondy BYSOL i BY_Help, roznych pradstaŭnikoŭ demakratyčnych struktur.
Častka źviestak była praŭdzivaj, častku padavali z manipulatyŭnymi kamientarami. Były ŭdzielnik kamandy Illa Biahun, jaki paśla staŭ łukašenkaŭskim prapahandystam, a ŭrešcie pajšoŭ vajavać suprać Ukrainy, paźniej zajaŭlaŭ, što skrynšoty pierarablali: paviedamleńni mahli pieranosić z adnaho boku pierapiski na druhi, kab schavać krynicu ŭciečki i pasiejać sumnieŭ. «Amal usie skryny — fejki», — kazaŭ jon, udakładniajučy, što sam źmiest pry hetym moh być realnym.
Admietna, što pačynajučy z červienia 2026 hoda — daty mierkavanaha aryštu Aleha Maisiejeva — telehram-kanał «Štab Anoška» zamaŭčaŭ. Za čatyry miesiacy nie źjaviłasia nivodnaha novaha vykryvalnaha ci kanśpirałahičnaha dopisu. Kanał ažyŭ tolki siońnia, paśla taho, jak «Jeŭraradyjo» sa spasyłkaj na svaje krynicy paviedamiła pra aryšt Maisiejeva.
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!5
Kamientary