Hałoŭnakamandujučy NATA: My majem vidavočnuju vajskovuju pieravahu nad Rasijaj

Pramoje ŭvarvańnie Rasii ŭ Jeŭropu małavierahodnaje, bo NATA maje vidavočnuju vajskovuju pieravahu. Mienavita tamu Maskva robić staŭku na dyviersii, ličyć hałoŭnakamandujučy Abjadnanymi ŭzbrojenymi siłami aljansu ŭ Jeŭropie Aleksus Hrynkievič.

Aleksus Hrynkievič

Paŭnočnaatłantyčny aljans maje vidavočnuju vajskovuju pieravahu nad Rasijaj. U hetym pierakanany hałoŭnakamandujučy Abjadnanymi ŭzbrojenymi siłami NATA ŭ Jeŭropie, hienierał-lejtenant VPS ZŠA Aleksus Hrynkievič.

«Vajskovyja mahčymaści, jakija my zadziejničali b u vypadku maštabnaha kanfliktu, značna pieraŭzychodziać mahčymaści Maskvy», — zajaviŭ Hrynkievič u intervju niamieckamu štotydnioviku Der Spiegel, apublikavanym 16 kastryčnika.

Pavodle hienierała, u arsienale Rasii niama ni sučasnych źniščalnikaŭ F-35, ni takoj kolkaści sučasnych eśmincaŭ i padvodnych łodak, jakoj vałodaje NATA.

U suviazi z hetym Hrynkievič upeŭnieny, što Rasija nie pačnie šyrokamaštabnaha napadu na jeŭrapiejskija krainy z vykarystańniem zvyčajnych uzbrajeńniaŭ.

«Pucin źviartajecca da inšych mietadaŭ, naprykład da dyviersij, bo ŭ jaho niama inšych varyjantaŭ. Pucin nie choča pramoha kanfliktu», — adznačyŭ Aleksus Hrynkievič.

Jon udakładniŭ, što ŭstrymlivajecca ad vykarystańnia termina «hibrydnyja ataki» dla apisańnia takich dziejańniaŭ Maskvy.

«Treba nazyvać rečy svaimi imionami: dyviersii, padpały abo terarystyčnyja ataki — heta dakładnyja vyznačeńni, na jakija jość kankretnyja adkazy», — patłumačyŭ Hrynkievič.

Na pytańnie intervjujera, ci znachodzicca Jeŭropa ŭžo ŭ stanie vajny z Rasijaj, hałoŭnakamandujučy NATA adkazaŭ:

«Heta niebiaśpiečnaja hulnia Uładzimira Pucina. Jon choča pierakanać našych hramadzian, što padtrymlivać Ukrainu niebiaśpiečna i što heta moža pryvieści da vajny z Rasijaj. Ale pakul heta nie spracoŭvaje».

Kamientujučy niadaŭnija pahrozy Maskvy, jakaja zajaviła, što izalacyja Kalininhradskaj vobłaści pryviadzie da pramoha vajennaha kanfliktu, Hrynkievič znoŭ padkreśliŭ, što NATA źjaŭlajecca abarončym aljansam i dziejničaje tolki ŭ vypadku napadu na jaho.

Adnak praz vajnu va Ukrainie pazicyi Rasii ŭ Kalininhradskaj vobłaści prykmietna asłabli, u toj čas jak NATA ŭmacavała svaje pazicyi ŭ Bałtyjskim rehijonie, adznačyŭ hałoŭnakamandujučy siłami aljansu ŭ Jeŭropie.

«Z vajennaha punktu hledžańnia situacyja tam (u Kalininhradzie. — Red.) niespryjalnaja dla Rasii», — skazaŭ Hrynkievič.

Kamientujučy dyviersiju ŭ aeraporcie Lejpcyh/Hale, u arhanizacyi jakoj abvinavačvajuć Rasiju, hienierał NATA zajaviŭ, što sama sproba stała «pierachodam miažy».

«Kali b napad mieŭ pośpiech, u pavietra ŭźlacieli b niekalki całkam zapraŭlenych samalotaŭ «Antonaŭ», i, vierahodna, byli b zahinułyja», — adznačyŭ hienierał.

Jon ustrymaŭsia ad prahnozaŭ nakont taho, jak NATA mahła b dziejničać u takim vypadku.

«Nam patrebnyja vielizarnyja kolkaści adnarazovych bajavych dronaŭ, bolš tannyja kryłatyja rakiety i šmat čaho inšaha», — dadaŭ jon.

Za niekalki dzion da hetaha Aleksus Hrynkievič na kanfierencyi pa biaśpiecy ŭ Varšavie pradstaviŭ novuju kancepcyju NATA pad nazvaj Theory of Victory («Teoryja pieramohi»). Zhodna ź joj, abarona terytoryi aljansu ŭ vypadku mahčymaj ahresii pavinna pačynacca jašče da taho, jak praciŭnik adkryje ahoń.

Kancepcyja praduhledžvaje try etapy vajennaha razhromu patencyjnaha ahresara. Na pieršym etapie siły NATA pavinny spynić napad (Block — «Błakavać»). Kali praciŭnik praciahnie bajavyja dziejańni, nieabchodna złamać jaho nastupalny impuls i nie dapuścić dalejšaha prasoŭvańnia (Blunt — «Prytupić»). Kali i hetaha budzie niedastatkova, dakumient praduhledžvaje razhrom varožych vojskaŭ i ŭsioj vajennaj sistemy, jakaja ich zabiaśpiečvaje i kantraluje (Break — «Źniščyć»).

U vypadku napadu na pieršym etapie hałoŭnaja rola advodzicca suchaputnym vojskam NATA na pieradavych rubiažach. Jany pavinny buduć spynić nastupleńnie, skavać i źniščać atakujučyja złučeńni.

Adnačasova avijacyja i vajskova-marskija siły pry padtrymcy kaśmičnych i kibiernietyčnych srodkaŭ pavinny jak maha chutčej zabiaśpiečyć pieravahu ŭ pavietry i na mory.

Kali praciŭnik, jakoha ŭ kancepcyi nie nazyvajuć, praciahnie nastupleńnie abo ŭviadzie dadatkovyja siły, NATA płanuje metanakiravana vyvieści sa stroju jaho vajennuju mašynu.

Kamientary da artykuła