MZS Biełarusi nazvaŭ płan NATA na vypadak rasijskaha napadu padrychtoŭkaj da ahresii
Biełaruś rašuča asudžaje zajavy hałoŭnakamandujučaha abjadnanymi ŭzbrojenymi siłami NATA ŭ Jeŭropie hienierała Aleksusa Hrynkieviča, jaki pradstaviŭ tak zvanuju «Teoryju pieramohi». Pra heta zajaviŭ pres-sakratar Ministerstva zamiežnych spraŭ Biełarusi Rusłan Varankoŭ.
Pavodle Varankova, kancepcyja praduhledžvaje previentyŭnyja ŭdary pa biełaruskaj terytoryi z vykarystańniem dronaŭ i naziemnych rabatyzavanych sistem, choć nasamreč płan NATA apisvaje dziejańni ŭ adkaz na napad Rasii na aljans.
«Pad prykryćciom abarončych farmulovak błok faktyčna rychtuje hlebu dla vajennaj eskałacyi i ahresii», — zajaviŭ pres-sakratar.
Jon taksama śćviardžaje, što Biełaruś nikomu nie pahražała, a jaje vajennaja daktryna maje vyklučna abarončy charaktar. MZS zaklikaŭ zachodnija krainy da dyjałohu i adnaŭleńnia davieru.
Hrynkievič pradstaviŭ «Teoryju pieramohi» na Varšaŭskim forumie biaśpieki. Jaje meta — spynić mahčymy rasijski napad na ŭschodni fłanh NATA. Płan praduhledžvaje try etapy: adbić pieršapačatkovuju ataku, spynić dalejšaje prasoŭvańnie i, kali ahresija praciahniecca, razburyć zdolnaść praciŭnika kiravać vojskami i zabiaśpiečvać ich.
U vypadku rasijskaha napadu siarod celaŭ nazvanyja rasijskija kamandnyja punkty i sistemy supraćpavietranaj abarony ŭ Biełarusi, Kalininhradskaj vobłaści i vakoł Pieciarburha. Takija ŭdary pavinny adkryć šlach dla kontrnastupu aljansu.
Biełaruskaja terytoryja vykarystoŭvałasia Rasijaj dla ŭvarvańnia va Ukrainu ŭ 2022 hodzie.
Kamientary