Kryšcijanu Ranałdu pačnie vypuskać minierałku

Słavuty partuhalski futbalist Kryšcijanu Ranałdu ŭkłaŭ 10 miljonaŭ jeŭra ŭ stvareńnie novaha brenda butylavanaj minieralnaj vady ŭ Partuhalii. Jahonym partnioram stała kampanija Grupo Outeirinho, jakaja taksama inviestavała ŭ prajekt 10 miljonaŭ jeŭra. Doli bakoŭ składajuć pa 50%, paviedamlaje SIC Noticias.

Kryšcijanu Ranałdu. Fota: AP Photo / Amr Nabil

Novuju vytvorčaść płanujuć raźmiaścić kala vioski Haštei ŭ akruzie Brahansa na poŭnačy Partuhalii. Miascovaja krynica była abranaja nievypadkova: joj prypisvajuć karysnyja dla zdaroŭja ŭłaścivaści, u tym liku antyaksidantny efiekt.

Pa słovach kiraŭnika Grupo Outeirinho Fransisku Fierejry, ideja partniorstva ŭźnikła dziakujučy supracoŭnicy kampanii, jakaja siabruje z adnym sa znajomych Ranałdu. Praź jaho futbalist vyjšaŭ na kantakt z kampanijaj. Abmierkavańnie prajekta, źviazanaha sa zdaroŭjem i ščołačnaj vadoj, pryviało da prapanovy ab sumiesnym udziele ŭ biznesie.

Grupo Outeirinho kantraluje kala 45% partuhalskaha rynku vady. Novy brend raspracoŭvaje italjanskaja dyzajnierskaja kampanija. Jaho kancepcyja i vizualny vobraz jašče znachodziacca ŭ stadyi raspracoŭki, ale adna z hałoŭnych zadač — zrabić pradukcyju dastupnaj dla šyrokaha koła spažyŭcoŭ. Zaviaršyć budaŭnictva zavoda raźličvajuć da kanca 2027 hoda.

Heta nie pieršy dośvied Ranałdu ŭ vodnym biznesie. U 2023 hodzie ŭ Ispanii byŭ pradstaŭleny brend minieralnaj vady Ursu9, adnym z suzasnavalnikaŭ jakoha taksama staŭ hety futbalist.

41‑hadovy Ranałdu piać razoŭ atrymlivaŭ «Załaty miač» i stolki ž razoŭ pieramahaŭ u Lizie čempijonaŭ. U składzie zbornaj Partuhalii jon staŭ čempijonam Jeŭropy ŭ 2016 hodzie i dvojčy vyjhravaŭ Lihu nacyj UEFA. Futbalist taksama pastaviŭ šerah rekordaŭ, u tym liku pa kolkaści hałoŭ za nacyjanalnyja zbornyja.

U śniežni 2022 hoda Ranałdu padpisaŭ kantrakt z saudaŭskim kłubam «Al-Nasr». Za kamandu jon pravioŭ 141 matč va ŭsich turnirach, zabiŭ 121 hoł i zrabiŭ 24 halavyja pieradačy. U červieni 2025 hoda futbalist zaklučyŭ novaje pahadnieńnie z kłubam na sumu bolš za 400 miljonaŭ dalaraŭ, raźličanaje da červienia 2027 hoda.

Pavodle rejtynhu Forbes, Ranałdu taksama ŭznačaliŭ śpis samych vysokaapłatnych futbalistaŭ śvietu. Za hod jon zarabiŭ 280 miljonaŭ dalaraŭ: 230 miljonaŭ skłali zarobak i bonusy, jašče 50 miljonaŭ — dachody ad sponsarskich kantraktaŭ.

Kamientary da artykuła