U rajonie vulicy Karžanieŭskaha pabudujuć most cieraz čyhunku
Jon złučyć Kastryčnicki i Maskoŭski rajony Minska.
Uźviadzieńnie estakady ŭ rajonie vulicy Karžanieŭskaha płanujuć raspačać pry kancy śniežnia 2026 hoda. Pra heta Minsk-Navinam paviedamiŭ dyrektar «Hardarbuda» Siarhiej Panioŭ.
U pradpryjemstva ŭ pracy kala 160 abjektaŭ. Siarod maštabnych prajektaŭ — padaŭžeńnie vuł. Čurlonisa (adcinak ad vulicy Čurlonisa da Karžanieŭskaha). Hety prajekt źviazany z rekanstrukcyjaj častki vulic, u tym liku terytoryi ŭ rajonie rynku kala 11‑j balnicy.
— U rajonie vuł. Karžanieŭskaha źjavicca estakada praz čyhunku, da budaŭnictva jakoj płanujem prystupić u kancy śniežnia. Pavodle značnaści jana budzie takoj ža, jak taja, što ŭzvodzicca praz čyhunku ŭ miežach vuł. Kaleśnikava — Cimirazieva, — udakładniŭ Siarhiej Panioŭ. — Siońnia schiema raźmiaščeńnia belek jašče kančatkova nie sfarmavanaja, pakolki abjekt niaprosty: zbudavańnie raźmieścicca nad Kurasoŭščynskim rynkam, projdzie nad inžyniernymi sietkami, źviazanymi z vodazabieśpiačeńniem i ciepłazabieśpiačeńniem. Tamu raźmiaščeńnie belek budzie zaležać ad stanovišča hetych kamunikacyj. Daŭžynia novaha zbudavańnia składzie kala 300—350 m, pry hetym my starajemsia paźbiahać vysokich nasypaŭ u horadzie.
Dyrektar «Hardarbuda» patłumačyŭ: pry budaŭnictvie darohi šyrynioj 10—15 m i vyšynioj nasypu 5—6 m praz uparadkavańnie adchonaŭ davodzicca adstupać ad darožnaha pałatna jašče na 10—15 m u bok.
Dziakujučy padaŭžeńniu vuł. Čurlonisa i budaŭnictvu mosta cieraz čyhunku ŭdasca złučyć vulicu Karžanieŭskaha z Maskoŭskim i Kastryčnickim rajonami.