Biełarusy pieramahli ŭ tendary na budaŭnictva smalenskaha aeraporta

Biełaruski padradčyk pieramoh u tendary na budaŭnictva novaha aeraporta «Smalensk-Paŭnočny». Pra heta paviedamiŭ miascovy partał Smolnarod.ru sa spasyłkaj na ŭłasnyja krynicy, zaŭvažyła vydańnie «Biełorusy i rynok». Nazvu kampanii-pieramožcy nie raskryvajuć.

Fota: smolnarod.ru

Raniej kiraŭnik administracyi Łukašenki Dźmitryj Kruty zajaŭlaŭ, što biełaruski bok płanuje ŭdzielničać u hetym prajekcie, a hienieralnym padradčykam stanie minskaja budaŭničaja kampanija. Pavodle jaho słoŭ, heta budzie adzin z najbujniejšych budaŭničych prajektaŭ, jakija Biełaruś ciapier realizuje ŭ Rasii.

Zhodna z tendarnaj dakumientacyjaj, ahulny pačatkovy košt rabot składaje amal 10 miljardaŭ rasijskich rubloŭ (kala 120 miljonaŭ dalaraŭ). Pieršy łot praduhledžvaje budaŭnictva ŭźlotna-pasadačnaj pałasy i infrastrukturnych abjektaŭ. Jaho košt — 4,19 miljarda rubloŭ (kala 50 miljonaŭ dalaraŭ). Druhi łot uklučaje budaŭnictva aeravakzalnaha kompleksu i inžyniernych sietak koštam 5,7 miljarda rubloŭ (kala 70 miljonaŭ dalaraŭ).

Płanujecca, što aeradrom budzie absłuhoŭvać unutranyja pasažyrskija rejsy. Aeravakzalny kompleks raźličany na prapusknuju zdolnaść 200 pasažyraŭ za hadzinu, a hadavy abjom pieravozak pavinien pieravysić 250 tysiač čałaviek.

Kamientary da artykuła