Łukašenka zadumaŭ puścić u mietro tramvai

Alaksandr Łukašenka daručyŭ vyvučyć mahčymaść vykarystańnia sučasnych tramvajaŭ u Minskim mietrapalitenie. Heta pytańnie jon padniaŭ 23 kastryčnika padčas naviedvańnia chołdynha «Biełkamunmaš», piša BiełTA.

Zdymak ilustracyjny. Fota: «Naša Niva»

Łukašenku pakazali ŭzory ajčynnaj tramvajnaj techniki, u tym liku trochsiekcyjny nizkapadłohavy tramvaj, jaki vyrablajuć dla Čalabinska. U hetym rasijskim horadzie raźvivajuć hibrydnuju sistemu mietratramvaja, jakaja abjadnoŭvaje zvyčajnyja tramvajnyja rejki i padziemnyja tuneli.

Palityk prapanavaŭ vyvučyć, ci možna paśla nieabchodnych dapracovak vykarystoŭvać takuju techniku ŭ biełaruskim mietro. Pavodle jaho słoŭ, heta mahło b dapamahčy zamianić impartnuju pradukcyju ajčynnaj.

Jon taksama adznačyŭ, što budaŭnictva padziemnych linij mietro značna daražejšaje za vykarystańnie naziemnaha transpartu. Tamu, na jaho dumku, tam, dzie heta mahčyma, varta vyvodzić transpartnyja maršruty na pavierchniu i ŭličvać vydatki.

«Biełkamunmaš» vyrablaje šmatsiekcyjnyja tramvai, jakija, jak miarkujecca, možna było b vykarystoŭvać zamiest zakuplenych za miažoj ciahnikoŭ mietro. Łukašenka źviarnuŭ uvahu i na patrebu ŭ takim transparcie dla złučeńnia z aeraportam i haradami-spadarožnikami Minska.

Pytańnie ab mahčymaści vykarystańnia tramvajaŭ u mietrapalitenie daručana vyvučyć u pieršaj pałovie 2027 hoda. Hetym pavinny zaniacca profilny ministr i vice-premjer razam z kiraŭnikami pradpryjemstvaŭ, a taksama staršynia Savieta Respubliki i ŭpaŭnavažanaja pradstaŭnica Łukašenki ŭ Minsku Natalla Kačanava.

Ministr pramysłovaści Andrej Kuźniacoŭ paviedamiŭ, što pakazany trochsiekcyjny tramvaj maje daŭžyniu 28 mietraŭ. Pry nieabchodnaści jaho možna padoŭžyć udvaja — da 56 mietraŭ. Mahčymaść vykarystańnia takoj techniki zaležyć ad infrastruktury čyhunačnaj linii. Jašče adna asablivaść tramvaja — dźviery z abodvuch bakoŭ vahona.

Kamientary da artykuła