Novyja mahistrali i most cieraz Drazdy. Jakoj budzie darožnaja sietka na poŭnačy Minska
Dastatkova biehłaha pohladu na kartu Minska, kab zaŭvažyć peŭny dysbałans u ščylnaści darožnaj sietki ŭ miežach MKAD. Poŭnač stalicy pamiž dvuma vadaschoviščami — Cnianskim i Drazdami — vidavočna pustuje. Ale situacyja ŭžo mianiajecca: zabudoŭvajucca kvartały «Paŭnočnaha bieraha», budujucca novyja vulicy i rekanstrujujucca ŭžo isnujučyja. Aktualnymi płanami z Onlíner padzialilisia ŭ prajektnym instytucie «Minskinžprajekt», a taksama ŭ kampanii «Ryviersajd Deviełapmient Limited», jakaja vystupaje zabudoŭščykam «Paŭnočnaha bieraha».
Arłoŭskaja — Karastajanavaj — Łanhbarda — MKAD
Pačniom ad zachodniaha bieraha Cnianskaha vadaschovišča i kvartałaŭ «Paŭnočnaha bieraha», jakija tam budujucca, i pojdziem na zachad, u napramku Drazdoŭ, to-bok suprać hadzińnikavaj strełki.
U «Minskinžprajekcie» zajmajucca raspracoŭkaj budaŭničych prajektaŭ dla inžyniernaj i transpartnaj infrastruktury, i ciapier možna havaryć pra zaviaršalny etap płanavańnia kvartałaŭ až da vośmaha. Zrazumieła, što tam, dzie vyrastajuć žyłyja damy, farmirujecca sistema novych darožnych mahistralaŭ i transpartnych suviaziaŭ.
Stalica raźvivajecca ŭ miežach radyjalna-kalcavoj schiemy, jakaja realizujecca i na poŭnačy. I adzin z novych «pramianioŭ» užo nieŭzabavie praciahniecca ad Druhoha kalca da MKAD. Maršrut projdzie pa vulicach Lilii Karastajanavaj i Iosifa Łanhbarda.
Na vulicy Lilii Karastajanavaj ciapier aktyŭna viaducca budaŭničyja raboty, prajeznuju častku pašyrajuć na ŭčastku ad vulicy Niakrasava da vulicy Arłoŭskaj z dalejšym raźvićciom u bok vulicy Kulman. Staić zadača ŭžo sioleta zabiaśpiečyć tut pramy prajezd, jak kažuć śpiecyjalisty. U rajonie skryžavańnia z vulicaj Arłoŭskaj raboty ŭviazvajuć z prajektavańniem čaćviortaj linii mietro, tamu rajon čakajuć vialikija źmieny.
Taksama viaducca raboty pa pieranosie dyśpietčarskaj stancyi «Karastajanavaj» na DS «Kulman».
U budučyni vulicu Lilii Karastajanavaj złučać z vulicaj Iosifa Łanhbarda, ruch pa asobnym učastku jakoj adkryli jašče letaś. Ciapier vulica Iosifa Łanhbarda adkrytaja na ŭčastku ad unutranaha kalca MKAD da vulicy Paŭła Maślenikava. Adtul da vulicy Lilii Karastajanavaj — mienš za dva kiłamietry, złučeńnie pavinna źjavicca ŭ rajonie vulicy Niakrasava.
U vyniku ad Druhoha kalca da «Paŭnočnaha bieraha» i MKAD źjavicca novy pramy maršrut.
Darečy, u miežach prajekta ŭzdoŭž hetaha maršrutu praduhledžanaja terytoryja dla raźvićcia chutkasnaha hramadskaha transpartu. Ci buduć na linii pracavać elektrobusy abo, mahčyma, chutkasny tramvaj — pabačym. Kantaktnaja sietka dla tramvaja na hetym etapie nie praduhledžvałasia, ale pakul nijakija varyjanty adkidać nie budziem.
Taksama ŭ prajekcie — vyjezd z vulicy Iosifa Łanhbarda na źniešniaje kalco MKAD. Usie, chto jechaŭ pa kalcavoj u hetym rajonie, bačyli, što daroha ŭžo padviedzienaja, nasyp jość — zastałosia pabudavać puciepravod na źniešni bok.
Arłoŭskaja — Smarhoŭski trakt — Paliny Miadziołki — MKAD
Jašče adzin «pramień», jaki pavodle płanaŭ złučyć Druhoje transpartnaje kalco i MKAD i jaki možna zaŭvažyć na prajektnych schiemach, projdzie praz Smarhoŭski trakt i vulicu Paliny Miadziołki. Heta budzie nie taki šyroki maršrut u paraŭnańni z Karastajanavaj — Łanhbarda, ale jak alternatyva, jak dublor jon budzie adyhryvać svaju rolu ŭ raźmierkavańni transpartnych patokaŭ.
Zrešty, pra pierśpiektyvy jaho stvareńnia havaryć pakul rana: heta vidavočna nie pieršačarhovaja zadača budaŭnikoŭ.
Vyrašeńnie prablemy Daŭhinaŭskaha traktu
A voś rola Daŭhinaŭskaha traktu ŭ asvajeńni paŭnočnaj častki horada, možna skazać, vyznačalnaja. Ciapier tam praciahvajecca čarhovy etap budaŭničych rabot. Možna ličyć, što da zavułka Čarviakova trakt hatovy, a voś dalej, u napramku vulicy Arłoŭskaj, to-bok Druhoha transpartnaha kalca, pracy jašče šmat.
Płan sfarmulavany dakładna: Daŭhinaŭski trakt — heta šeść pałos ruchu na ŭsioj jaho praciahłaści. Ale pieraškadžaje pryvatnaja zabudova. U «Minskinžprajekcie» raskazali, što ŭ płanach — znos paśla ŭrehulavańnia pytańnia z majomasnymi pravami hramadzian. Pry hetym za zavułkam Čarviakova asnoŭny maršrut źmienić napramak, paviarnuŭšy faktyčna na Staravilenski trakt.
Paśla taho jak prastoru rasčyściać, trakt pašyrać, a staraja prablema «butelečnaha rylca» pierad vyjezdam na Arłoŭskuju budzie vyrašanaja.
Pa Navavilenskaj da MKAD
Narešcie, jašče adzin «pramień», jaki źviaža Druhoje kalco i MKAD u paŭnočnaj častcy horada, pamiž Cnianskim vadaschoviščam i Drazdami, — vulica Navavilenskaja paśla zapłanavanaj rekanstrukcyi. Tam praduhledžana budaŭnictva šaścipałosnaj mahistrali i transpartnaj raźviazki z kalcavoj darohaj. Pavodle najaŭnaj infarmacyi, prajektavańnie hetaha maršrutu praciahvajecca, a pačatak budaŭnictva raźviazki na MKAD zapłanavany na 2027 hod.
Treciaje kalco
Z tak zvanymi «pramianiami» razabralisia, pierachodzim da kolcaŭ.
Praciaham vulicy Šyrokaj, jakaja viadzie ad Łahojskaha trakta, pavinna stać novaja Prajektavanaja vulica.
— Prajekt jość, budaŭnictva budzie vieścisia ŭ dźvie čarhi. Nieabchodna pieravieści ŭ kabiel vysakavoltnuju liniju 110 kV, jakaja ciapier prakładzienaja pa pavietry. Paralelna budzie budavacca vulica, — raskazvajuć u «Minskinžprajekcie».
Pieravod u kabiel — heta, kažučy sproščana, pieramiaščeńnie vysakavoltnaj linii pad ziamlu. Tam šmat śpiecyfiki i svaich abmiežavańniaŭ, ale nam dastatkova razumieć, što pravady, jakija ciapier naciahnutyja pamiž aporami ŭ pavietry, buduć pieraniesienyja ŭ padziemnyja kabielnyja sietki.
Hetaja novaja vulica źviaža ŭsie apisanyja vyšej maršruty, a na skryžavańniach u troch vypadkach z čatyroch źjaviacca kalcavyja raźviazki. Pa sutnaści, heta raźvićcio Treciaha transpartnaha kalca: duha, jakaja viadzie faktyčna ad Sierabranki, narešcie atrymaje praciah i ŭ pierśpiektyvie zamkniecca.
— Što da Treciaha transpartnaha kalca: ciapier u pracy puciepravod na vulicy Kaleśnikava, taksama prapracoŭvajecca prajekt złučeńnia vulic Čurlonisa i Łandera, a na pieradprajektnaj stadyi — złučeńnie Siarova sa Špileŭskaha i Maniuški z Malinava, — kažuć u instytucie.
Darečy, jašče adzin prajekt — puciepravod, jaki złučyć vulicu Śvisłackuju z vulicaj Sialickaha. Heta maršrut-dublor Partyzanskaha praśpiekta.
Most praz Drazdy?
Vierniemsia na poŭnač horada. Pa miery taho jak buduć zabudoŭvacca žyłyja kvartały, budzie raści popyt na novyja šlachi znosin. Užo vidavočnaja padrychtoŭka suviaziaŭ z MKAD i Druhim kalcom, a praciah vulicy Šyrokaj źviaža hetyja rajony z paŭnočna-zachodniaj častkaj horada, daść vychad da Łahojskaha traktu i vulicy Kalinoŭskaha.
Zastajecca adno pytańnie: ci budzie pramy šlach na zachad, da praśpiekta Pieramožcaŭ?
Jość płan, pavodle jakoha praciah vulicy Šyrokaj — Prajektavanaja vulica — praciahniecca da parku Drazdy i, zrabiŭšy duhu, vyjdzie da praśpiekta Pieramožcaŭ nasuprać vulicy Viasiołkavaj, jakaja da jaho prymykaje.
Narešcie, samy ambicyjny prajekt — most praz vadaschovišča Drazdy. Śpiecyjalisty pryznajuć, što taki maršrut apraŭdany, ale jak mienavita i kali jon moža być realizavany — pakul zahadvać nie varta.
Karta miascovaści
Padviadziom vyniki. Heta schiema kłasifikacyi vulična-darožnaj sietki ŭ paŭnočnaj častcy horada pamiž Cnianskim vadaschoviščam i Drazdami. Nieabžytyja terytoryi ŭ pierśpiektyvie kardynalna źmieniacca. I praca viadziecca ŭžo ciapier.
— Asablivych prablem niama, — adznačajuć u «Minskinžprajekcie». — Što nam, naprykład, bałota? My viedajem, što ź im rabić. Jość śpiecyfika, źviazanaja sa znosam žylla, pierakładkaj vielizarnych vodapravodaŭ, vysakavoltnych linij, a reljef i hrunty ciažkaściaŭ nie vyklikajuć.
— Dzie praściej pracavać: u čystym poli budavać z nula ci pierarablać toje, što było stvorana kaliści?
— Viadoma, z nula budavać lahčej. Navat kali pahladzieć na płan isnujučych sietak na hetym učastku: na adnym kvadratnym mietry ich mohuć być dziasiatki. I ŭsio heta treba pierakładvać, u adnoj kabielnaj trubie moža być 10—15 kabielaŭ, a takich kanałaŭ moža być i 24, i 48. I kožny kabiel treba ŭzhadnić z ekspłuatacyjnaj arhanizacyjaj, z uładalnikam, usio pierapadklučyć nanova.
— Zima na nosie. Heta paŭpłyvaje na chod rabot?
— Ziemlanyja raboty zimoj pravodziacca, truby i sietki ŭkładvajucca. Tolki asfalt zimoj nie kładuć. Zrazumieła, azielanieńniem nie zajmajucca. Ale apory možna stavić, bietanavać taksama možna — technałohii jość, usio adpracavana. Uvohule, pracujem, — padsumavali śpiecyjalisty.
Kamientary