Minčuk pakazaŭ, jak razam z susiedziami pryvioŭ u paradak padjezd
Kolki ž patracili?
Dźmitryj raspavioŭ u Threads, što niekalki hadoŭ nie byŭ u Minsku. A kali pryjechaŭ da baćkoŭ, vielmi ŭraziŭsia domam: «Padjezd vyhladaŭ jak uvachod u śvinarnik. I heta ŭ centry horada, paśla kapramontu».
Razam z susiedziami mužčyna navioŭ paradak u padjeździe. Jany nabyli farbu, zrabili mietaličnuju tabličku pa svaim makiecie, zamianili niepryhožyja nalepki, admyli parapiet i dźviery ad hrybku i padciokaŭ.
Kaštavała heta ahułam 70 dalaraŭ. Cikava, što bolšuju častku sumy — 40 dalaraŭ — kaštavała stylovaja šyldačka z aluminiju (zamaŭlaŭ jaje mužčyna ŭ Šviecyi — pryjšła praz tydzień).
Pieršapačatkova Dźmitryj dumaŭ prykleić novuju šyldu pavierch staroj na vadkija ćviki, ale spužaŭsia, što ŭzimku jana moža ŭpaści. A śvidravać samastojna nie advažyŭsia. Pajšoŭ u ŽES uzhadniać źmieny, ale tam ludziam było ŭsio roŭna: «Ciotka ŭnutry: «Ničoha ŭzhadniać nie treba. Prynoście choć kaśmičny karabiel, usio paviesim». Paviesiŭ šyldačku majstar užo praz hadzinu.
Za dzień halinka nabrała bolš za 100 tysiač prahladaŭ i 3,5 tysiač padabajek. A ŭ kamientarach vyśvietliłasia, što napraŭdu šmat chto ź biełarusaŭ nie čakaje cudaŭ ad ŽESa i robić ramont u padjezdach samastojna.
Adzin z kamientataraŭ paličyŭ dopis za znak, što i jamu nadyšoŭ čas zaniacca pryviadzieńniem u paradak padjezdu.
Niechta žartavaŭ, što ŽES anałahičnyja pracy acaniŭ by na 7 tysiač dalaraŭ. Ale šmat chto i aburaŭsia tym, što ludzi vymušany rabić toje, na što rehularna pieraličvajuć hrošy.