U minskim mietro patłumačyli pryncyp pracy aŭtamatyčnych dźviarej na Zielenałužskaj linii

Na stancyjach Zielenałužskaj linii Minskaha mietrapalitena pastavili aŭtamatyčnyja płatformavyja dźviery, jakija adździalajuć pasažyrskija płatformy ad čyhunačnych puciej. U pres-słužbie mietro patłumačyli, jak jany pracujuć i jak imi karystacca.

Hetyja aharodžy pryznačanyja dla biaśpieki pasažyraŭ: jany nie dazvalajuć ludziam vypadkova abo naŭmysna trapić u zonu ruchu ciahnikoŭ.

Dźviery adčyniajucca aŭtamatyčna adnačasova ź dźviaryma ciahnika i začyniajucca paśla taho, jak začyniajucca dźviery vahonaŭ. Na stvorkach praduhledžanyja ručki dla avaryjnaha adčynieńnia ŭručnuju. Karystacca imi dazvalajecca tolki ŭ avaryjnych abo inšych nadzvyčajnych situacyjach.

Kali płatformavyja dźviery nie adčyniajucca aŭtamatyčna, prymusova adčynić ich pavinien supracoŭnik mietrapalitena. Tamu pasažyram nie varta sprabavać samastojna adčyniać ich u zvyčajnych abstavinach.

Ciapier na Zielenałužskaj linii Minskaha mietro pracujuć siem stancyj: «Słucki Haściniec», «Niemaršanski sad», «Aeradromnaja», «Kavalskaja Słabada», «Vakzalnaja», «Płošča Franciška Bahuševiča» i «Jubilejnaja płošča».

Praciahvajecca budaŭnictva jašče troch stancyj hetaj linii: «Piarespa», «Kamaroŭskaja» i «Park Družby narodaŭ».

Na płatformach stancyj Maskoŭskaj i Aŭtazavodskaj linij takija dźviery pakul što nie stavili.

Kamientary da artykuła