Minskija ŭłady patłumačyli, čamu nie nazyvajuć dakładnyja daty adkryćcia novych stancyj mietro
Dakładnuju datu adkryćcia novych stancyj treciaj linii Minskaha mietrapalitena pakul nie nazyvajuć. Pryčyna hetaha, jak śćviardžaje ŭ efiry prahramy «Licom k licu» na telekanale ANT staršynia Minharsavieta Arciom Curan, nie ŭ niedachopie rabočych.
Asnoŭnaja prablema, pa słovach čynoŭnika, źviazanaja sa składanymi hruntami i vysokim uzroŭniem hruntovych vod, jakija patrabujuć dadatkovaj inžyniernaj padrychtoŭki.
Tamu Arciom Curan zajaviŭ, što stancyi adkryjucca ŭ ahladnaj pierśpiektyvie, adnak nazyvać kankretny dzień pakul zaŭčasna.
Budaŭnictva troch stancyj Zielenałužskaj linii praciahvajecca. Na asobnych učastkach ciapier pravodziać składanyja raboty dla panižeńnia ŭzroŭniu hruntovych vod. Hrunty pad ziamloj ciažkija i nasyčanyja vadoj, tamu biez adpaviednaj padrychtoŭki biaśpiečna prakłaści tuneli niemahčyma.
Razam z tym tempy budaŭnictva atrymałasia pavialičyć u dva razy dziakujučy źmienie technałohii prakładki tunelaŭ. Raniej spačatku budavali adzin tunel, paśla čaho tuneleprachodčy kompleks razvaročvali i prakładali druhi ŭ advarotnym kirunku. Ciapier abodva tuneli budujuć adnačasova.
Paralelna ŭžo pačałasia padrychtoŭka da nastupnaha etapu raźvićcia staličnaha mietro — čaćviortaj, abo kalcavoj linii. Pavodle ciapierašnich płanaŭ, novaja linija projdzie ŭzdoŭž druhoha transpartnaha kalca Minska.
Usiu kalcavuju liniju adrazu budavać nie buduć — jaje padzielać na niekalki etapaŭ. Na pieršym učastku płanujuć pabudavać try stancyi. Adna ź ich stanie bujnym pierasadačnym vuzłom na skryžavańni z praśpiektam Pieramožcaŭ. Haradskija ŭłady raźličvajuć, što i hety ŭčastak budzie realizavany ŭ ahladnaj pierśpiektyvie.
Adnačasova ŭ Minsku praciahvajecca budaŭnictva bujnoj transpartnaj raźviazki pamiž mikrarajonami Lebiadziny i Kamiennaja Horka. Jana pavinna złučyć Frunzienski i Centralny rajony. Adkryć ruch pa novaj raźviazcy płanujuć užo ŭ najbližejšyja miesiacy.
Raboty tam viaducca kruhłasutačna, u tym liku nočču i ŭ vychadnyja. Paśla zakančeńnia hetaj raźviazki darožniki płanujuć uvieści ŭ ekspłuatacyju jašče dva bujnyja transpartnyja vuzły ŭ Kastryčnickim, Leninskim i Maskoŭskim rajonach. Pavodle płanaŭ, jany pavinny zamknuć druhoje transpartnaje koła i častkova pieraraźmierkavać transpartny patok, jaki ciapier idzie pa MKAD.
Ciapier čytajuć
Stalinista-jabaćku z Homiela zatrymali paśla taho, jak jon zaprasiŭ Łukašenku na hvałtoŭnaje zakryćcio svajho treciaha kafe24
Kamientary