U biełaruskich Geely źjaviŭsia surjozny kankurent — Changan rasijskaj zborki. Što za jon i kolki kaštuje
Mašynu pačali źbirać na zavodzie «Aŭtator» u Kalininhradzie. Praz heta Changan UNI-V patańnieŭ bolš jak na $3000 u paraŭnańni z mašynami, jakija raniej impartavali ŭ Biełaruś z Kitaja.
Changan UNI-V. Fota: changan.by
Kitajski sport
Sama madel vypuskajecca z 2021 hoda, ale ŭ Rasii jaje zborku naładzili tolki sioleta. Ceny na kitajski fastbek rasijskaj zborki ciapier pačynajucca z 75 900 rubloŭ (kala $25700).
Pad kapotam u Changan UNI-V — bienzinavy 1,5‑litrovy turbamator mahutnaściu 188 k.s., jaki pracuje ŭ pary z 7‑stupienčataj AKPP. Z nula da sotni aŭtamabil razhaniajecca za 7,1 siekundy.
Mašynu ceniać za spartyŭny dyzajn, jaki prahladajecca jak zvonku, tak i znutry. UNI-V maje aktyŭny zadni spojler, jaki raniej možna było ŭbačyć tolki na takich aŭto, jak Porsche, Audi i inšych nie samych tannych brendaŭ.
Changan UNI-V. Fota: changan.by
Sałon aŭtamabila taksama maje spartyŭnyja notki za košt trochśpicavaha rula i siadzieńniaŭ ź jarka vyražanaj bakavoj padtrymkaj.
Changan UNI-V. Fota: changan.by
Na fonie taho, što ŭ liniejcy kitajska-biełaruskich Geely/Belgee amal usie mašyny — heta krasoviery, Changan UNI-V, jaki patańnieŭ, moža stać adčuvalnym kankurentam, bo, niahledziačy na ahulny rost papularnaści krasovieraŭ, nie ŭsim jany daspadoby.
Da plusaŭ UNI-V adnosiać vysoki ŭzrovień azdableńnia navat u bazavaj viersii i dobruju kiravanaść, jakaja prynamsi častkova adpaviadaje źniešniamu vyhladu. Ahułam možna adznačyć, što hety aŭtamabil vyhladaje našmat daražej, čym kaštuje.
Changan UNI-V. Fota: changan.by
Ale nievysokaja cana adnosna vyhladu i azdableńnia adlustroŭvajecca ŭ minusach, na jakija, zychodziačy z vodhukaŭ, skardziacca ŭłaśniki.
Siarod minusaŭ adznačajuć materyjały sałona nie samaj vysokaj jakaści, jakija vielmi lohka paškodzić, praz što interjer davoli chutka pačynaje vyhladać paciortym navat pry nievialikim prabiehu.
Taksama skardziacca na nizki ŭzrovień šumaizalacyi i davoli žorstkuju padviesku, zatočanuju pierš za ŭsio dla jazdy pa dobrych darohach. Akramia žorstkaści padvieski, inšyja minusy pa vialikim rachunku ŭłaścivyja ŭsim kitajskim mašynam biudžetnaha siehmienta, bo cudaŭ nie byvaje i dla dasiahnieńnia nievysokaj cany vytvorcam davodzicca ekanomić na materyjałach.
Changan UNI-V. Fota: changan.by
Z ulikam taho, što cana ŭpała bolš jak na try tysiačy dalaraŭ, možna mierkavać, što Changan UNI-V budzie karystacca popytam siarod biełarusaŭ. Adzinyja, chto moža być mocna niezadavoleny tym, što takija aŭto pačali źbirać u Rasii, — heta ŭłaśniki, jakija nabyli ich raniej i zapłacili za toj samy aŭtamabil amal na 10 tysiač rubloŭ bolš.
Kolki taki Changan kaštuje ŭ Rasii?
Niahledziačy na toje, što mašyna sabranaja ŭ rasijskim Kalininhradzie, u samoj Rasii Changan UNI-V miascovaj zborki kaštuje bolš jak u paŭtara raza daražej, čym u Biełarusi (kala $44 tysiač). Taki paradoks adbyvajecca i ŭ vypadku sa spradvieku rasijskaj Lada.
Mašyny rasijskaj zborki ŭ Biełarusi kaštujuć tańniej praz šerah faktaraŭ: u krain roznyja mietodyki naliku ŭtylzboru, a taksama roznyja ŭmovy dla impartu mašyn fizičnymi asobami. Aproč taho ŭ Biełarusi isnujuć lhotnyja ŭmovy na impart elektramabilaŭ. Tamu i rynak u Biełarusi bolš kankurentny, što taksama ŭpłyvaje na ceny.
Pry hetym u Rasii zrabili tak, što rasijanam nie vyhadna kuplać novyja aŭto ŭ Biełarusi, bo pa pryjeździe ŭ Rasiju im daviadziecca dapłacić utylzbor.
Što za zavod u Kalininhradzie?
Zavod «Aŭtatar» u Kalininhradzie pracuje ź siaredziny dzievianostych i źjaŭlajecca adnym z samych bujnych u Rasii. U pikavyja hady tam źbirali kala 200 tysiač mašyn za hod.
Da 2022 hoda na pradpryjemstvie «Aŭtatar» vypuskali lehkavyja aŭtamabili BMW, KIA i Hyundai. U Biełarusi aŭtamabili marki Changan aficyjna pradajucca z 2024 hoda.